Þjóðbúningamynstrin óþrjótandi uppspretta nýrra akrílmálverka

Ég sæki í þjóðbúningamynstrin, þau eru óþrjótandi uppspretta því þar er alls konar saumur eftir tímabilum. Tvö, þrjú blóm hafa orðið uppáhalds og mér finnst fallegra að hafa verkin einföld en vera með margar tegundir saman,“ segir Guðbjörg Ringsted myndlistarmaður sem opnar sýningu á akrýlmálverkum í Safnahúsi Húsavíkur í dag, laugardag, klukkan 14.

Titill sýningarinnar, Þá og nú, vísar bæði í gamla og nýja tíma, þar eru verk frá árinu 2012 fram til dagsins í dag og sýna þá þróun sem orðið hefur á verkum Guðbjargar á því tímabili.

„Ég var trú þekktum mynstrum fyrst, meðan ég var að þreifa sig áfram, nú er flæðið orðið meira. En það er mikil fínvinna í blómunum, þar nota ég hárfínan pensil en mála svo grunninn með breiðum pensli og grófari. Þannig verða til andstæður,“ segir hún.

Sýningin stendur til 31. júlí. Guðbjörg kveðst hafa unnið átta ný verk fyrir hana en þau verði um tuttugu talsins og af ýmsum stærðum.