Fríða sú fyrsta í hundrað landsleiki | Silfurlið ÓL alltof sterkt fyrir stelpurnar okkar

Íslenska kvennalandsliðið í blaki lék í kvöld sinn fyrsta leik í annarri umferð í undankeppni HM sem fram fer í Varsjá.

Mótherjarnir voru silfurlið Serbíu frá Ólympíuleikunum í Ríó síðasta haust og það var ljóst frá byrjun að þetta yrði mjög erfiður leikur fyrir íslensku stelpurnar.

Leikurinn fór 3-0 fyrir Serba sem eru eins og er þriðja sæti styrkleikalista alþjóða blaksambandsins. Hrinurnar fóru 25-13, 25-15 og 25-9.

Stigahæstar í íslenska liðinu voru Elísabet Einarsdóttir og fyrirliðinn Jóna Guðlaug Vigfúsdóttir með 7 stig hvor.

Fyrir leikinn fékk Fríða Sigurðardóttir viðurkenningu fyrir 100 landsleiki og er hún leikjahæsta landsliðskona Íslands í blaki frá upphafi.