Elliðavatn vaknar með stórurriðum á færinu

Loksins vaknar uppáhaldsveiðivatn borgarbúa úr vordvalanum en aðstæður við vatnið í gær voru frábærar og þar mátti sjá fisk vaka víða um vatnið.

Það var mikil umferð við vatnið í gær í blíðskaparveðri en fólk í kvöldbíltúr, hestamenn, krakkar á skellinöðrum og veiðimenn nutu útivistar við vatnið í gær.  Þrátt fyrir að aðstæður væri jafn góðar og raun bar vitni og vakir um allt vatn var takan ekkert rosalega góð og fáir veiðimenn sem settu í fisk.

Það var þó vinur greinarhöfundar, Joau Duarte, sem toppaði kvöldið með því að setja í og landa um 5 punda urriða sem var sleppt aftur að lokinni viðureign.  Hann hefur verið duglegur að kíkja uppá Elliðavatn í vor en það hefur verið heldur rólegt framan af voru þangað til í fyrrakvöld en þá náði hann 7 punda fisk á sama stað og hann náði þessum fisk sem sést á myndinni í gær.  Það mátti greinilega sjá þegar þessir stóru fiskar voru að skvetta sér í yfirborðinu innan um vakir frá minni urriðum og bleikju.  Það var mikið klak á flugu í gær og greinilega veisla hjá fiskinum við vatnið í gær.

Spáin um helgina er mjög góð og aðstæður til veiða orðnar góðar um allt land í vötnum á láglendi en þó er einstaka vatn í innsveitum líka farið að taka við sér og Skagaheiðin er að sama skapi að vakna til lífsins.  Ég held að okkur sé óhætt að segja þetta veiðisumar hér komið komið í gang.