Mikil fjölgun rjúpna á nokkrum svæðum samkvæmt talningu

Það skýtur kannski skökku við að skjóta inn frétt um rjúpur svona þegar stangveiðitímabilið er að sigla inn í sína bestu tíð en þetta eru góðar fréttir af stofninum.

Það er mikill fjöldi skotveiðimanna sem gengur á hverju ári til rjúpna og vangaveltur um stærð stofnsins á hverju ári ásamt veiðiálagi er umræða sem er alltaf í gangi.  Rjúpnatalningum á vegum Náttúrufræðistofnunar Íslands vorið 2017 er lokið samkvæmt fréttatilkynningu frá stofnuninni. Mikil fjölgun rjúpna var alls staðar nema á Vestfjörðum, Suðausturlandi og Austurlandi sem kemur ekki á óvart en nokkuð regluleg niðursveifla hefur verið dýpri á þessum svæðum en öðrum. 

Samkvæmt upplýsingum frá stofnuninni voru stofnbreytingar rjúpu 2016–2017 nokkuð mismunandi eftir landshlutum en eins og áður segir var fækkun á Vestfjörðum og Suðausturlandi, kyrrstaða á Austurlandi en aukning annars staðar.  Miðað við ástand rjúpnastofnsins frá síðustu aldamótum þá er stærð hans í meðallagi eða aðeins yfir meðallagi  í öllum landshlutum nema á Vestfjörðum, þar er hann enn í djúpri lægð.  Mat á veiðiþoli rjúpnastofnsins mun liggja fyrir í ágúst í kjölfar mælinga á varpárangri rjúpna nú í sumar. Jafnframt munu þá liggja fyrir útreikningar á afföllum rjúpna 2016–2017 og mat á veiði haustið 2016 segir en fremur á heimasíðunni.  Fréttatilkynninguna má lesa í heild sinni hér.