Blanda opnar með 15 löxum fyrsta daginn

Fyrstu fréttir af opnunardeginum í Blöndu lofa sannarlega góðu en dagana og vikuna fyrir opnun sáust laxar bæði í Damminum og á Breiðunni sem gaf til kynna að opnunin gæti orðið góð.

Það voru sannarlega orð að sönnu því eftir fyrsta dag veiða voru komnir 15 laxar á land ásamt því að nokkrir sluppu og þar af höfum við frétt af einum stórlaxi sem sleit hraustann taum eftir góða baráttu.  Blanda virðist því fara vel af stað og lofar þetta góðu um framhaldið en laxinn er svo til allt fallegur og vel haldinn tveggja ára lax.

Veiði hefst svo síðar á svæðum 2, 3 og 4 og það verður að segjast að þrátt fyrir að svæði 3 og 4 séu að öllu jöfnu gjöfulli en svæði 2 er það ekki vegna laxaskorts heldur frekar vegna ástundunar en það er oft laust á þetta svæði.  Svæði 2 er nefnilega alveg magnað veiðisvæði með stórum og fallegum breiðum.  Það sem þarf til að veiða vel á þessu svæði er að fá leiðsögn og leiðbeiningar frá þeim sem þekkja það vel og það er til veiðistaðalýsing sem Þorsteinn Hafþórsson gerði um árið og við viljum bara reikna með að starfsfólk Lax-Á sé með hana undir höndum því með þennan leiðarvísir undir höndum eiga veiðimenn mun auðveldara með að glöggva sig á aðstæðum og læra á svæðið.  Allur lax sem fer á 3 og 4 fer þarna í gegn svo á góðu ári eru þetta nokkur þúsund laxar sem renna þarna á milli og það köllum við góða veiðivon.