Fýlubomba Brynjars á vegg Þórðar Snæs veldur ólgu

Brynjar Níelsson þingmaður varpar óvænt sprengju á Facebookvegg Þórðar Snæs Júlíussonar ritstjóra Kjarnans. Þar segir hann:

„Það er ekki gott að vera tjá sig mikið um eitthvað sem maður hefur ekkert vit á, Þórður“ Punktur. Þessi stutta setning hefur vakið verulega athygli og reiði á mörgum bæjum.

Brynjar Níelsson þingmaður var ekki viðstaddur atkvæðagreiðslu í þingi þá er tillaga Sigríðar Á Andersen dómsmálaráðherra, sem laut að skipan 15 dómara við nýtt millidómsstig. Málið hefur vakið mikla athygli en það hefur verið kennt við misbeitingu valds, þá á þeim forsendum að fjórir á lista Sigríðar voru ekki á lista þeim sem sérstök hæfisnefnd lagði fram.

Ömurlegur og óheiðarlegur gjörningur

Þórður Snær Júlíusson, ritstjóri Kjarnans, hefur fjallað ítarlega um málið og segir rökstuðning dómsmálaráðherra ekki standast lágmarks skoðun. Sigríður segist vera á höttunum eftir meiri reynslu af dómsstörfum, en þegar það er skoðað nánar halda þær skýringar engu vatni. Þórður sparar ekki stóru orðin. Hann talar um valdníðslu, að traust á dómsstólum og Alþingi sé í molum.

„Það sem átti sér stað í gær er risa­mál. Það var sam­þykktur gjörn­ingur sem er ömur­legur og óheið­ar­leg­ur. Borð­leggj­andi er að rök­stuðn­ingur ráð­herr­ans gengur ekki upp heldur eru önnur sjón­ar­mið sem ráða ákvörðun henn­ar. Trú­verð­ug­leiki Lands­rétt­ar, dóms­kerf­is­ins og Alþingis hefur beðið hnekki. Skað­inn er skeð­ur. Og þann skaða eiga Við­reisn og Björt fram­tíð skuld­laust.“

Krefst útskýringa

Brynjar, sem er fyrrverandi formaður Lögmannafélags Íslands, hefur ekki tjáð sig um þetta mál ef frá er talin þessi eina setning. Sem helgast líkast til af þeirri einföldu staðreynd að ný á lista Sigríðar er eiginkona hans. En, hann gat ekki stillt sig um að hnýta í Þórð Snæ.

Ljóst er að ritstjóranum blöskrar hinar knöppu skammir Brynjars: „Viltu útskýra það nánar Brynjar Níelsson? Ertu að segja að þingmennirnir sem kusu með skipan ráðherra hafi ekkert vit á því sem þeir eru að gera? Eða eigum við flónin ekkert að vera að biðja þingmenn um að rökstyðja ákvarðanir sínar?“

Brynjar þögull

En, Brynjar ansar engu. Árni Snævarr erindreki bregst ókvæða við orðum Brynjars. „Ótrúlegur hroki hjá [Brynjari Níelssyni]. Miklar líkur eru á því að hann hafi knúið fram þessa breytingu með yfirgangi. Ef hann af öllum mönnum vill leiðréttingu á kynjahlutfalli, þá er það brandari ársins. Brynjar hefur stórskaðast pólitískt á þessu máli - dapurlegt því hann er að ýmsu leyti góður maður. Vald spillir, svo einfalt er það.“

Ekkert svar og svo enn eitt dæmi sé nefnt af þeim sem ofbýður framganga þingmannsins þá leggur Einar Steingrímsson stærðfræðingur orð í belg: „Þetta er ekki bara heimskulegt og hrokafullt hjá Brynjari; það er líka ósmekklegt af honum að tjá sig yfirleitt um þetta mál þar sem eiginkona hans er ein af þeim sem ráðherrann ákvað að skipa ...“