Sérsveitin ekki sjáanleg

Mikill viðbúnaður var við Austurvöll í morgun þegar forsætisráðherra flutti hátíðarræðu sína. Hann segir Íslendinga þurfa að varast að hér á landi skapist jarðvegur fyrir hryðjuverk.

Austurvöllur var girtur af við morgunathöfnina og tugir lögreglumanna gættu svæðisins. Allir voru þeir óvopnaðir en þó með kylfur og piparúða.

Vopnaðir sérsveitarmenn, sem ríkislögreglustjóri hefur staðfest að gættu miðborgarinnar í dag, voru hins vegar hvergi sjáanlegir og hafa greinilega látið lítið fyrir sér fara. Er þetta breyting frá til dæmis Litahlaupinu þar sem vopnaðir sérsveitarmenn voru fyrirferðarmiklir.

Í ræðuni sagði Bjarni að lögreglan nyti mikils trausts og að ein af frumskyldum ríkisins væri að tryggja öryggi og varnir landsins. Heimurinn stæði frammi fyrir ógnum af ýmsu tagi og þá einna helst hryðjuverkahættu.

„Á Íslandi er hættustig metið í meðallagi, sem þýðir að ekki er hægt að útiloka hættu á hryðjuverkum, bæði vegna ástands innanlands eða í heimsmálum. Við verðum að varast að hér skapist jarðvegur fyrir hryðjuverk. Við verðum að gera allt sem í okkar valdi stendur til þess að tryggja að við getum áfram verið friðsöm þjóð," sagði Bjarni Benediktsson, forsætisráðherra.

Lítið fór fyrir boðuðum mótmælum á Austurvelli vegna vígbúnaðarins en fréttastofa taldi einungis tvo mótmælendur sem létu eitthvað fyrir sér fara.  Þá voru hvorki lögregla né sérsveitarmenn sjáanlegir á hátíðarsvæðinu við Hljómskálagarðinn og sögðust viðmælendur hvorki hafa hafa tekið eftir mikilli gæslu né séð sérsveitina.