Telja að skútu hafi hvolft með tveimur innanborðs

Mikill viðbúnaður er við Skerjafjörð eftir að tilkynning barst um skútu á hvolfi. Tveir menn eru sagðir hafa sést ofan á kilinum, en hvorki hefur tekist að finna skútuna né mennina.

Slökkvilið höfuðborgarsvæðisins var sent á staðinn sem og köfunarteymi, björgunarsveitir og þyrla Landhelgisgæslunnar, en köfunarteymið var afturkallað fyrir stundu. Slökkviliðið er á sama tíma í óðaönn við að slökkva eld sem kom upp í húsnæði við Bauganes í Skerjafirði.

Fréttin verður uppfærð þegar frekari upplýsingar liggja fyrir.

Uppfært klukkan 21.05

Að sögn slökkviliðsins hafa viðbragðsaðilar verið afturkallaðir eftir að leit bar ekki árangur. Frekari upplýsingar séu ekki fyrir hendi að svo stöddu.