EM-hópurinn hjá stelpunum okkar valinn í dag

Það kemur í ljós í dag hvaða 23 leikmenn Freyr Alexandersson, landsliðsþjálfari kvenna í fótbolta, velur í lokahópinn fyrir EM 2017 í Hollandi.

Freyr tilkynnir hópinn á blaðamannafundi í höfuðstöðvum KSÍ í dag en fundurinn hefst klukkan 13.15 og verður Vísir með beina sjónvarps- og textalýsingu úr Laugardalnum.

Mikil spenna ríkir fyrir valinu þar sem þrír reynsluboltar; Hólmfríður Magnúsdóttir, Sandra María Jessen og Harpa Þorsteinsdóttir voru ekki með í síðustu leikjum á móti Írlandi og Brasilíu.

Hólmfríður og Sandra María hófu báðar tímabilið í Pepsi-deildinni meiddar en báðar eru komnar til baka og hafa verið að raða inn mörkum. Sandra María skoraði þrennu og lagði upp eitt mark í 8. umferðinni þegar Þór/KA vann Grindavík, 5-0.

Stærsta spurningamerkið er markadrottningin Harpa Þorsteinsdóttir sem er nýbyrjuð að spila aftur með Stjörnunni eftir barnsburð. Hún var í byrjunarliði Stjörnunnar í síðasta leik og sagðist í viðtölum eftir hann vera klár í slaginn fyrir EM.

Ungir nýliðar í landsliðinu eins og Agla María Albertsdóttir, Stjörnunni, og Ingibjörg Sigurðardóttir, Breiðabliki, gætu verið á leið á sitt fyrsta stórmót en ný kynslóð er að ryðja sér til rúms í íslenska liðinu.

Freyr þarf ekki að skila inn lokahópnum fyrr en tíu dögum áður en EM hefst en hann má skipta út meiddum leikmönnum fram að fyrsta leik gegn Frakklandi 18. júlí.

Fylgstu með vali lokahópsins í beinni útsendingu á Vísi klukkan 13.15 í dag.