Klæddur í hvítan læknaslopp vopnaður byssu

Tveir eru látnir og nokkrir særðir eftir skotárásina á Bronx Lebanon sjúkrahúsinu í New York í Bandaríkjunum fyrr í kvöld. Árásarmaðurinn var fyrrverandi læknir á spítalanum og var klæddur hvítum læknasloppi þegar hann skaut úr riffli, en hann er á meðal hinna látnu.

Árásin var gerð rétt fyrir klukkan 15 að staðartíma í dag, eða um klukkan 19 að íslenskum tíma, á 16. hæð sjúkrahússins. Skömmu eftir að maðurinn, Henry Bello, hleypti skotunum af skaut hann sjálfan sig og að sögn AP-fréttastofunnar fannst lík konu við hlið hans.

Óstaðfestar fregnir herma að sex séu særðir eftir árásina, þar af þrír læknar, en ekki er vitað um líðan þeirra.

Lögreglan sendi frá sér skilaboð á Twitter skömmu eftir árásina þar sem hún bað fólk um að halda sig fjarri spítalabyggingunni. Árásarmaðurinn fannst ekki strax og var spítalinn girtur af á meðan leit stóð yfir.

Relief outside #BronxLebanon Hospital for those who made it out safely. #1010WINS pic.twitter.com/jzZEJCezg2

— Sonia Rincón (@SoniaRincon) June 30, 2017