Innlent

Fótboltaforeldrar með börnin í skottinu í Vestmannaeyjum

Kolbeinn Tumi Daðason skrifar
Frá rjómablíðunni í Vestmannaeyjum þar sem boltinn rúllaði í síðustu viku.
Frá rjómablíðunni í Vestmannaeyjum þar sem boltinn rúllaði í síðustu viku. Orkumótssnappið
Lögreglan í Vestmannaeyjum segist hafa á sínu borði upplýsingar um að börn sem kepptu á Orkumótinu um um liðna helgi og síðustu viku hefðu verið ferjuð á milli staða í skottinu. Mótið er fyrir stráka í 6. flokki, fæddir árið 2007 og 2008.

 Í Fésbókarfærslu á vef lögreglunnar kemur fram að vikan hafi verið annasöm enda gestkvæmt í Eyjum vegna mótsins. Alls voru 112 lið skráð til leiks á mótið en sjö leikmenn eru í hverju liði auk varamanna auk þess sem foreldrar fjölmenna á mótið. 

 „Nóg var að gera í að sinna umferðarmálum enda fjöldi bifreiða á götum bæjarins. Þá var eitthvað um að lögreglan aðstoðaði fólk sem hafði slasast við hinar ýmsu aðstæður,“ segir í færslunni.

 „Eftir Orkumótið fékk lögregla upplýsingar um að börn hefðu verið sett í farangursrými bifreiða og ferjuð þannig á milli staða. Slíkt athæfi er að sjálfsögðu algerlega óboðlegt og stórhættulegt og eflaust ekkert foreldri sem myndi samþykkja slíka meðferð á sínu barni.“

 Þá þurfti lögreglan að sinna fleiri málum, meðal annars eina nóttina þegar upp úr sauð á milli dyravarða og gests á skemmtistað í bænum. Kallaði gesturinn til lögreglu.

Meðal gesta á Orkumótinu var Guðni Th. Jóhannesson, forseti Íslands, sem fylgdist með sínum mönnum í Stjörnunni en sonur hans æfir með Garðabæjarliðinu.

Lögreglumál

Mest lesið


Fleiri fréttir

Sjá meira


×

Mest lesið