Yfir 20 stiga hiti víða á Suðurlandi

Ágætis veður var víðast hvar á landinu í dag og nutu landsmenn veðurblíðunnar. Besta veðrið var þó líklega á Suðurlandinu þar sem hitinn fór víða yfir 20 stig. Mesti hitinn sem mældist í Reykjavík við höfuðstöðvar Veðurstofunnar við Bústaðaveg var 15 gráður.

„Það var mjög bjart víða á landinu og það var hlýjast á Suðurlandi þó að það hafi langt því frá verið slegin einhver met. Hitinn fór yfir 20 stig á nokkrum stöðum sem hefur mjög sjaldan gerst í sumar og það var hlýjast í Árnesi og Skálholti þar sem það mældist tæp 21 gráða,“ segir Haraldur Eiríksson, vakthafandi veðurfræðingur, á Veðurstofu Íslands í samtali við Vísi.

Hann segir að á morgun sé svo góð spá á landinu öllu þar sem verði rólegheita veður og víða léttskýjað.

„En svo er það búið í bili þar sem það er gert ráð fyrir rigningu á miðvikudag á Suður-og Vesturlandi en þá verður besta veðrið á Norðausturlandi.“

Veðurhorfur næstu daga eru annars þetta samkvæmt spá á vef Veðurstofunnar:

Fremur hæg vestlæg eða breytileg átt og léttskýjað með köflum, en sums staðar þokuloft í nótt. Þykknar upp á SV- og V-landi annað kvöld. Hiti 10 til 17 stig að deginum.

Á miðvikudag:

Sunnan 5-10 m/s og súld eða rigning, en þurrt á NA- og A-landi. Hiti 10 til 17 stig, hlýjast NA-til.

Á fimmtudag:

Hæg breytileg átt, skýjað með köflum og smáskúrir. Hiti 10 til 17 stig.

Á föstudag:

Suðaustan 5-15 m/s, hvassast við SV-ströndina. Fer að rigna á S- og V-landi, en þykknar upp N- og A-lands. Hiti 10 til 18 stig, hlýjast norðan heiða.

Á laugardag:

Suðvestlæg átt og víða skúrir. Heldur kólnandi veður.

Á sunnudag:

Norðvestlæg átt og rigning, en stöku skúrir S- og V-lands. Hiti 8 til 17 stig, hlýjast syðst.

Á mánudag:

Vestlæg átt, skýjað með köflum og yfirleitt þurrt.