Hitinn gæti náð 20 stigum

Sólríkt og gott veður verður í dag og á morgun en hitastigið gæti náð allt að tuttugu stigum á suðvesturhluta landsins. Suðlægar áttir með vætu verða hins vegar ríkjandi frá og með miðvikudeginum og frma á næstu helgi.

„Góðviðrisdagar í dag og á morgun,“ segir í hugleiðingum veðurfræðings á vef Veðurstofunnar.

Þá verður skýjað fyrir norðan og austan en allar líkur eru á að það nái að létta til víða norðvestanlands og jafnvel einnig við Eyjafjörð þegar líður á daginn. Annars yfirleitt skýjað fyrir austan og smáskúrir.

Hér fyrir neðan má sjá veðurhorfur á landinu næstu daga en hægt er að skoða nánari spá á veðursíðu Vísis:

Miðvikudagur

Sunnan 8-13 m/s og rigning, en hægari og þurrt NA-til. Hiti 9 til 17 stig, hlýjast NA-lands.

Fimmtudagur

Hægviðri og rigning SA-til framan af degi, en annars stöku síðdegisskúrir. Hiti 10 til 17 stig.

Föstudagur

Suðaustan 8-15 m/s, hvassast við SV-ströndina. Rigning víða um land, en lengst af þurrt NA-til. Hiti 10 til 17 stig, hlýjast NA-til.

Laugardagur

Suðvestlæg átt, skúrir og kólnar í veðri.