Ólafía: Búin að spila mjög vel

Ólafía Þórunn Kristinsdóttir spilaði lokahring sinn á Marathon Classic mótinu í Ohio-fylki í Bandaríkjunum.

Ólafía spilaði sinn besta hring í dag en hún hafði farið hringina á 71,70 og 72 höggum fyrir lokahringinn í dag.

„Ég er búin að vera að spila mjög vel. Á fyrsta deginum var ég að slá vel með drivernum en svo datt hann aðeins út, þannig að ég fór að slá af teig með þrjú tré síðan. Ég er búin að vera hársbreidd í púttunum framan af í mótinu en í dag þá voru þau að falla með mér,“ sagði Ólafía í viðtali við heimasíðu LPGA eftir seinasta hringinn í dag.

Ólafía tekur með sér fullt af jákvæðum punktum fyrir Opna skoska mótið í Aberdeen sem er í Evrópumótaröðinni og byrjar 27. júlí

„Stutta spilið mitt er mjög gott og ég þarf að fínpússa aðeins lengri höggin aðeins með drivernum og þrjú trénu en annars held ég bara að það sé komið,“ sagði Ólafía.

Ólafía og aðalstyrktaraðili hennar KPMG eru að halda góðgerðarmót sem verður haldið 8. ágúst næst komandi, hún vonast eftir því að sjá sem flesta.

„Það verður vonandi geggjað og ég vonast eftir því að sem flestir komi,“ sagði Ólafía brosandi eftir að hafa leikið frábært golf á seinasta deginum á Marathon Classic mótinu sem er hluti af LPGA mótaröðinni.