Veðrið búið að vera veiðimönnum erfitt

Það er ekki hægt að segja að veðrið hafi verið veiðimönnum sérstaklega hliðhollt síðustu daga en hvassviðrið sem hefur geysað síðan á föstudag hefur gert veiðimönnum lífið leitt.

Skilyrðin hafa verið vægast sagt öfgafull síðustu daga emð hvassviðri og mikilli sól á suður og vesturlandi sem fylgir nokkur eða mikill hiti yfir daginn.  Fyrir norðan hefur verið hægari vindur víða en það kólnaði mikið frá síðustu helgi þegar það var um og yfir 20 stiga hiti og hæglætis veður alla daga.  Það getur svo sem verið fínt veður í bleikjuveiði en heldur leiðinlegra þegar verið að kasta fyrir lax.

Sem betur fer er skárra veður í kortunum hvað varðar vindstyrk en ekki er þó beinlínis hægt að segja að um neitt draumaveiðiveður sé að ræða en spáin frá Veðurstofunni segir Norðan- og norðaustanátt, víða 8-13 m/s. Súld eða rigning á A-verðu landinu, annars skýjað með köflum og úrkomulítið.  Heldur hægari og víða smá skúrir á morgun, en léttskýjað V-til fram á kvöld. Hiti 12 til 20 stig að deginum, hlýjast SV-lands, en 7 til 13 stig á N- og A-landi.  Á þriðjudag, miðvikudag og fimmtudag:  Fremur hæg norðlæg eða breytileg átt, skýjað með köflum og stöku skúrir. Hiti 10 til 17 stig að deginum.