Faðir segir Robert Downey fá uppreist æru eins og eftir umsókn um Costco kort

Faðir einnrar stúlkunnar sem Robert Downey var dæmdur í þriggja ára fangelsi fyrir að misnota kynferðislega, segir að það sé nánast eins auðvelt að fá uppreist æru og sækja um Costco kort. Hann vill að allt ferlið í málinu verði upplýst og fagnar boðuðum lagabreytingum.

Stundin greindi frá því í dag að innanríkisráðuneytið hefði afhent fjölmiðlinum að hans ósk afrit af bréfinu sem veitti Róbert Downey uppreist æru. Undir bréfið skrifa Ólöf heitin Nordal þáverandi innanríkisráðherra og Ragnhildur Hjaltadóttir ráðuneytisstjóri hinn 14. september 2016. Það er síðan lagt fram til kynningar án umræðu í ríkisstjórn daginn eftir og tveimur dögum frá undirritun ráðherra, hinn 16. september, fellst Guðni Th. Jóhannesson forseti Íslands á tillöguna. Tillagan er að lokum staðfest á ríkisráðsfundi hinn 21. október 2016, væntanlega með öðrum málum sem eru staðfest í ríkisráði.

Bergur Þór Ingólfsson faðir einnrar stúlku af fjórum sem Robert Downey, þá Róbert Árni Hreiðarsson, var dæmdur árið 2008 fyrir að hafa misnotað kynferðislega, vill að allt ferlið að baki því að Róbert fékk uppreist æru verði opinberað.

„Ég er náttúrlega ánægður af fá að sjá þetta bréf. Loksins eftir sjö vikna baráttu um að fá að sjá eitthvað um þetta mál. Efst í huga er að fá að sjá restina af þessu. Hvernig var staðið að öllu þessu ferli. Hvers vegna dæmdum glæpamanni sem samkvæmt lögum fremur svívirðilegan glæp skuli vera veitt uppreist æra. Án þess að hann, svo nokkur annar viti, hafi viðurkennt að hann hafi í rauninni framið þessi brot,“ segir Bergur Þór.

Hann myndi til að mynda vilja fá að sjá rökstuðninginn á bakvið ákvörðun embættismanna og innanríkisráðuneytis fyrir því að Róberti var veitt uppreist æra. Bergur Þór fagnar yfirlýsingum dómsmálaráðherra og margra þingmanna um nauðsyn þess að breyta lögum varðandi uppreist æru. En það breyti því ekki að Róbert hafi nú fengið heimild til þess að gegna yfirburðastöðu í þjóðfélaginu.

Okkur þykir skrýtið að maðurinn fái að komast í þessa stöðu eins og að sækja um, ég veit ekki hvað, Costco kort. Hann bara tikkar í box og gjörið svo vel,“ segir Bergur Þór Ingólfsson.