Ingólfur skrifar til ungra karlmanna sem vilja deyja: „Þú ert ekki einn“

Knattspyrnumaðurinn Ingólfur Sigurðsson beinir orðum sínum að ungum karlmönnum sem vilja deyja í pistli sem birtist á Vísi í gærkvöldi. Ingólfur glímir sjálfur við geðsjúkdóm en hann var á unglingsaldri þegar hann var greindur með kvíðaröskun.

Hann greindi fyrst frá veikindunum í ítarlegu viðtali við Morgunblaðið árið 2014 og rúmu ári síðar hélt hann áhrifamikinn fyrirlestur um veikindin á málþingi í Háskólanum í Reykjavík þar sem andleg líðan íþróttamanna var til umfjöllunar.



Sjá einnig:Fyrirlestur Ingólfs: Ég er með geðsjúkdóm

Tölfræðin sýnir að sjálfsvíg eru algengasta dánarorsök ungra karlmanna hér á landi en skrif Ingólfs koma í kjölfar sjálfsvíga tveggja ungra manna í þessum mánuði sem báðir sviptu sig lífi á geðdeild Landspítalans.

Þá sagði Anna Gunnhildur Ólafsdóttir, framkvæmdastjóri Geðhjálpar, frá því í viðtali á RÚV í gær að samtökin hafi beðið í tvö ár eftir greiningu Landspítalans á því hvað gerðist þegar maður svipti sig lífi en hann hafði komið að lokuðum dyrum á geðdeild spítalans.

„Ég veit að enginn skilur þig“

„Kæri ungi karlmaður sem vilt deyja,

Fyrir það fyrsta þá vil ég segja við þig: Þú ert ekki einn. Og því fer fjarri.

Ég veit þér líður eflaust þannig, einum að rogast með allar heimsins tilfinningar, í myrkrinu sem gleypir allt eins og Pacman sem á vegi þess verður, ógnvægilega tómarúminu sem fær þig til að öskra, sársaukafulla dofanum sem streymir um líkamann,“ segir Ingólfur í upphafi pistils síns og heldur áfram:

„Ég veit það er freistandi að láta sig hverfa, að kveðja fyrir fullt og allt, loka dyrunum hljóðlega á eftir sér, með hag allra í kringum sig í forgrunni. Það er eins og allir séu komnir með nóg af manni, vanlíðaninni, af veseninu sem fylgir, þetta er svo fjandi erfitt. Það er búið að tala við þig klukkustundunum saman á rólegum nótum, þér leið kannski betur á meðan því stóð, en vanlíðanin jókst enn frekar þegar stundargleðin leið hjá, og ég veit að fólkið í kringum þig hefur eflaust grátið, blótað, öskrað og ekki vitað í hvorn fótinn skuli stíga gagnvart þér. En þú ert ekki einn.

Ég veit að enginn skilur þig. Hvernig ætti svo sem nokkur manneskja að geta sett sig í spor okkar? Það skilur enginn þennan sársauka nema að upplifa hann sjálfur. Og skömmin, maður. Það er ekkert sérlega karlmannslegt að gráta eins og barn, að líða illa í sálinni. Svo þegar maður segir frá því hvernig manni líður er stundum eins og hjálpin sem á að fást við það snúist upp í andhverfu sína. Manni líður bara verr fyrir vikið, eins og strá salti á sárið, enn önnur áminningin um skilningsleysið sem maður býr við. Þú verður stundum fyrir fordómum, án þess að manneskjan sem beitir þeim átti sig endilega á því, og það er fjandi fúlt.“

Bráðaþjónusta geðsviðs ekki opin allan sólarhringinn

Hann fer síðan yfir þau meðferðarúrræði sem eru í boði fyrir þá sem glíma við andleg veikindi en dýrt er að fara til sálfræðings auk þess sem bráðaþjónusta geðsviðs Landspítalans er ekki opin allan sólarhringinn.

„Ég veit að meðferðarúrræðin sem eru í boði eru djók. Klukkutími hjá sálfræðingi upp á tólf þúsund kall? Ég skal koma ef ég má borga sálfræðitímana mína á raðgreiðslum næstu tólf árin. Geðsvið Landspítalans er djók. Ekki fólkið sem vinnur þar, alls ekki, en kerfið. Hvernig getur verið opnunartími á geðdeild? Að vera synjað um hjálp, bent á að fara niður á Landspítalann í Fossvogi. Þvílíka niðurlægingin. „Það opnar aftur í fyrramálið.“ Já, ókei. En ef ég er með hjartverk? Ætliði þá að senda mig líka heim yfir nóttina? Síðan er bara eitthvað skrifstofufólk í jakkafötum í einhverjum fundarherbergjum sem þykist vera í einhverjum rótargreiningum. „Það er eitthvert vesen á geðdeildinni. Hmm. Segjumst bara setja það í ferli, þá róast allir.“

Ég veit að þú hefur einhvern tímann drullað upp á bak. Að þér líði eins og þú hafir málað þig sjálfur út í horn, allir hafi snúist gegn þér, og innst inni finnst þér það ósanngjarnt. En við skulum sleppa því að segja það upphátt, það myndi falla í grýttan jarðveg, og þetta helvítis líf virðist ekki snúast um neitt annað nema halda öðrum á góðu hliðinni hjá sér. Það er líka vont að særa, það stingur inn að beini, og maður kann einhvern veginn ekki að leysa úr því. Hversu oft þarf maður að segja fyrirgefðu til að allt verði eins og áður?“

Ingólfur ítrekar síðan þau orð sín til unga mannsins að hann er ekki einn.

„Ekki í eina sekúndu. Ég er með þér í liði. Ég dæmi þig ekki í eina sekúndu. Ég bakka þig upp, alla leið. Ef þú bakkar mig upp. Við eigum líka miklu fleiri liðsfélaga en okkur óraði nokkurn tímann fyrir. Það eru þúsundir ungra karlmanna á Íslandi. Mörghundruð þeirra þekkja þær hörmungar sem við höfum gengið í gegnum og það eru enn fleiri hundruðir sem munu þurfa að upplifa það sem við höfum gengið í gegnum. Við verðum að berjast hvor fyrir annan. Ef þú berst fyrir mig, þá berst ég fyrir þig. Ég tóri fyrir þig, ef þú tórir fyrir mig. Við erum merktir sama liðinu, við erum allir liðsfélagar, og hvað sem bjátar á, þá skulum við standa uppi sem sigurvegarar.“

Pistil Ingólfs má lesa í heild sinni hér. Hér fyrir neðan má síðan horfa á fyrirlestur Ingólfs sem hann hélt í Háskólanum í Reykjavík á málþinginu um andlega líðan íþróttamanna.