Haustbragur á veiðitölum vikunnar

Landssamband Veiðifélaga birti nýjar tölur úr vikuveiðinni í laxveiðiánum á miðvikudagskvöldið og árnar eru að eiga misgóða viku.

Sem fyrr er það Ytri Rangá sem trónir á toppi listans með heildarveiði upp á 4218 laxa og vikuveiðin þar á bæ var 472 laxar.  Nú eru átta laxveiðiár komnar yfir 1000 laxa markið og líklega eru tvær sem komast þangað á næstunni en það eru Grímsá þar sem 918 laxar hafa veiðst en veitt er í um mánuð þar í viðbót.  Selá í Vopnafirði er komin í 813 laxa og það verður að teljast líklegra en ekki en henni takist að fara yfir 1000 laxa á lokametrunum.

Árnar í dölunum hafa átt betri sumur það er víst en vatnsleysi þar hefur sett mikið strik í reikninginn í sumar.  Rigning sem er spáð á vesturlandi um helgina gæti hleypt tökunni í gang þar sem og í Borgarfirði en heldur dræm taka hefur verið í Borgarfjarðaránum síðustu daga að með þeirri undantekningu að veiðin í síðustu viku var afar góð í Þverá og Kjarrá en alls veiddust 177 laxar þar í síðustu viku.

Topp fimm listinn er hér fyrir neðan en heildarlistinn yfir veiðina í viðmiðunaránum má finna sem fyrr á www.angling.is

1. Ytri-Rangá 4218 laxar - vikuveiði 472 laxar.

2. Miðfjarðará 2668 laxar - vikuveiði 282 laxar.  

3. Þverá og Kjarará 1777 laxar - vikuveiði 177 laxar.

4. Eystri-Rangá 1685 laxar - vikuveiði 284 laxar.

5. Blanda 1390 laxar - vikuveiði 59 laxar.