Forstöðumaður Kvíabryggju og forseti bæjarstjórnar skrifuðu meðmæli Árna Johnsen

Fyrrverandi forstöðumaður Kvíabryggju og fyrrverandi forseti bæjarstjórnar Vesturbyggðar skrifuðu meðmæli fyrir Árna Johnsen, fyrrverandi þingmann Sjálfstæðisflokksins, þegar hann sótti eftir uppreist æru og fékk árið 2006. Meðal þess sem þeir Vilhjálmur Pétursson og Guðmundur Sævar Guðjónsson skrifuðu í meðmæli Árna var að hann hefði haldið uppi góðum anda á Kvíabryggju og hann hefði skilað verkefni sem hann vann fyrir Vesturbyggð með sóma.

Þetta kemur fram í gögnum sem Dómsmálaráðuneytið hefur sent á fjölmiðla. Gögnin snúa í heild sinni að 32 dæmdum brotamönnum sem hafa fengið uppreist æru á síðastliðnum 22 árum.

Árna var veitt uppreist æru árið 2006 en hann hlaut tveggja ára fangelsisdóm, staðfestan í Hæstarétti árið 2003, fyrir fjárdrátt og umboðssvik í opinberu starfi. Við það hlaut Árni kjörgengi á ný og bauð hann sig aftur fram til þings árið 2007 og var kjörinn.

Þá gaf hann kost á sér í prófkjöri Sjálfstæðisflokksins í Suðurkjördæmi í fyrra.

26 atriði

Lögmaður Árna nefnir í umsókninni, sem er tímasett þann 14. júní 2006, að hann hefði hvorki gerst sekur um brot gegn almennum hegningarlögum né sérrefsilögum frá því hann lauk afplánun sinni þann 16. nóvember 2003. Á því tímabili hefði hann hegðað sér óaðfinnanlega, verið virkur þátttakandi í þjóðfélaginu og voru nefnd 26 dæmi um það í umsókninni.

Á meðal þeirra dæma eru að Árni hafi staðið fyrir góðgerðartónleikum, unnið að uppbyggingu húss Gísla á Uppsölum, gefið út plötu, unnið að ljóðabók, verið þulur og einn af dagskrárstjórum þjóðhátíðar Vestmannaeyja í um 30 ára skeið, hann hafi látið stækka 60 ljósmyndir úr safni sínu, hafi unnið að því að útvega flygil í félagsheimilið í Garði og margt fleira.

Hélt uppi góðum anda

Í meðmælum Vilhjálms Péturssonar, fyrrverandi forstöðumanns Kvíabryggju, segir:

„Hegðun og framkoma frábæra, einnig einstaklega duglegur og samlagðist vel vistmönnum. Hélt uppi góðum anda í húsinu meðan hann dvaldi á Kvíabryggju.

Þá segir í meðmælum Guðmundar Sævars Guðjónssonar, fyrrverandi forseta bæjarstjórnar Vesturbyggðar:

„Árni Johnsen starfaði hjá okkur í Vesturbyggð að atvinnu- og ferðamálum sumarið 2004. Vinna hans fólks í því að gera úttekt á möguleikum í atvinnusköpun og ferðaþjónustu. Skilaði hann því verkefni með sóma, sá ágæti drengur. Fyrir liggur áfangaskýrsla frá honum með um 80 hugmyndum, mögnuð skýrsla sem nýtist okkur vel. Okkar samstarf er eins og best er á kosið og nýtur hann fyllsta traust. Í alla staði hefur mátt treysta því sem hann segir og gerir og hann vinnur undur hratt. Árni náði einstaklega traustu og vinsamlegu sambandi við allt fólk sem hann vann með á okkar slóðum og er honum óskað alls velfarnaðar í starfi og leik.“

Handhafar forsetavalds í fjarveru forseta Íslands, það er forsætisráðherra, forseti Alþingis og forseti hæstaréttar, skrifuðu undir umsókn Árna.

Á skjalinu má sjá að búið er að skrifa: „Föllumst á tillöguna“ og undir skrifa þau Geir H. Haarde, þáverandi forsætisráðherra, Sólveig Pétursdóttir, þáverandi forseti Alþingis, Björn Bjarnason, þáverandi dómsmálaráðherra, Gunnlaugur Claessen, þáverandi forseti Hæstaréttar, og Þorsteinn Gerisson, þáverandi ráðuneytisstjóri Dómsmálaráðuneytisins.

Uppfært: Í upprunalegu útgáfu fréttarinnar var Guðmundur Sævar Guðjónsson ranglega sagður hafa verið bæjarstjóri Vesturbyggðar. Hið rétta er að hann var forseti bæjarstjórnar.