Verða Valsmenn Íslandsmeistarar í fyrsta sinn í áratug?

Heil umferð fer fram í Pepsi-deild karla í dag.

Klukkan 16:00 hefjast fimm leikir og klukkan 19:15 verður flautað til leiks hjá Val og Fjölni.

Með sigri verða Valsmenn Íslandsmeistarar í fyrsta sinn í 10 ár, burt séð frá úrslitum í öðrum leikjum dagsins. Fjölnismenn eru hins vegar í baráttu á hinum enda töflunnar en þeir eru aðeins einu stigi frá fallsæti.

Botnlið ÍA tekur á móti Stjörnunni sem á enn möguleika á verða Íslandsmeistari. Stjörnumenn eru sjö stigum á eftir Valsmönnum og verða að vinna Skagamenn og treysta á að Fjölnismenn taki stig af Valsmönnum til að eygja von um að verða meistarar í annað sinn í sögu félagsins.

ÍA þarf hins vegar að vinna til að eiga möguleika á að halda sér í Pepsi-deildinni.

FH mætir ÍBV í Kaplakrika en þessi lið áttust við í bikarúrslitaleiknum í síðasta mánuði. Þar höfðu Eyjamenn betur, 1-0.

FH-ingar eiga enn veika von um að verja Íslandsmeistaratitilinn en þeir hugsa væntanlega fyrst og síðast um að tryggja sér Evrópusæti.

Eyjamenn geta farið langt með að bjarga sér frá falli með sigri í Krikanum.

Í Frostaskjólinu tekur KR á móti KA. Þarna mætast liðin í 4. og 5. sæti deildarinnar.

KR-ingar eiga enn möguleika á að ná Evrópusæti á meðan KA-menn sigla lygnan sjó.

Grindavík og Breiðablik mætast suður með sjó. Báðum liðum hefur gengið illa að undanförnu og þyrstir í sigur.

Í Ólafsvík mætast svo Víkingsliðin tvö í miklum fallslag. Ólsarar eru í ellefta og næstneðsta sæti deildarinnar en með sigri í dag hleypa þeir miklu lífi í botnbaráttuna. Reykjavíkur-Víkingar hafa aðeins fengið eitt stig í síðustu fjórum leikjum og mega ekki tapa í kvöld.

Leikir dagsins:

16:00 FH - ÍBV (beint á Stöð 2 Sport 3)

16:00 ÍA - Stjarnan

16:00 KR - KA

16:00 Grindavík - Breiðablik

16:00 Víkingur Ó. - Víkingur R.

19:15 Valur - Fjölnir (beint á Stöð 2 Sport)

Farið verður yfir alla leikina í Pepsi-mörkunum sem hefjast klukkan 21:15 á Stöð 2 Sport.