Almannatengill segir Benedikt hafa brugðist rétt við

Andrés Jónsson almannatengill segir að Benedikt Sveinsson hafi brugðist rétt við með yfirlýsingu sem hann sendi fjölmiðlum í dag. Þetta kom fram í spjalli hans í Reykjavík Síðdegis á Bylgjunni í dag en þáttastjórnendur báðu Andrés um að gefa sitt álit á atburðum dagsins út frá hans reynslu í starfi sem almannatengill.

Vísir greindi frá því síðdegis að Benedikt hefði veitt Hjalta Sigurjóni Haukssyni meðmæli um uppreist æru. Hjalti hlaut fimm og hálfs árs fangelsisdóm árið 2004 fyrir ítrekuð kynferðisbrot á dóttur sinni.

Stundin birti á sjötta tímanum í dag bréf Benedikts til dómsmálaráðuneytisins. Bréfið sem Benedikt segir Hjalta hafa skrifað og hann sett nafn sitt við.

Mér er bæði ljúft og skylt að staðfesta að ég hef á umliðnum misserum fylgst með Hjalta Sigurjóni Haukssyni, (...), og komist að raun um að hann hefur tekið á sínu lífi með miklum sóma og þráir innilega að lifa heiðvirðu og heilbrigðu lífi. Öll hans framganga er til fyrirmyndar. Virðingarfyllst, Benedikt Sveinsson. 

Vísir hafði samband við Benedikt um tíuleytið í morgun og spurði hann út í málið. Bendikt vildi hvorki játa því né neita að hann hefði veitt Hjalta meðmæli. Hann sagðist mögulega myndu senda frá sér yfirlýsingu vegna málsins, eða ekki. Vísir greindi frá því klukkan 15:45 að Hjalti hefði fengið meðmæli Benediks og 43 mínútum síðar sendi Benedikt frá sér yfirlýsingu.

Þar bað hann alla þá sem ættu um sárt að binda vegna málsins afsökunar að hafa hjálpað Hjalta.

Fram kom í kvöldfréttum Stöðvar 2 að Bjarni Benediktsson hefði vitað af því að faðir hans væri meðal meðmælenda í júlí þegar Sigríður Á. Andersen dómsmálaráðherra sagði honum frá því. Þá staðfesti dómsmálaráðherra sömuleiðis að ekkert virkt eftirlit væri með því hvort þeir sem skrifuðu meðmælabréf hefðu í raun og veru gert það.

Átti að vera lítið góðverk

„Hjalti Sigurjón Hauksson var um tíma tengdur kunningjafólki okkar hjóna frá skólaárum. Hann hefur í nokkur skipti leitað aðstoðar hjá mér, fyrst og fremst vegna fjárhagsmála eða í tengslum við atvinnuleit. Engin önnur tengsl hafa verið á milli okkar,“ sagði í yfirlýsingu Benedikts.

„Á síðasta ári leitaði Hjalti til mín um meðmæli vegna uppreistar æru. Hann kom til mín með bréf, tilbúið til undirritunar. Ég skrifaði undir bréfið og hef ekki vitað af málinu síðan, fyrr en það kom til opinberrar umfjöllunar nú í sumar. Ég ræddi ekki meðmælabréfið við nokkurn mann, hvorki í stjórnkerfinu né annars staðar, og hef aldrei verið spurður frekar út í málið. Allur aðdragandi og umbúnaður málsins var sá að verið væri að ganga frá formsatriði fyrir umsókn til stjórnsýslunnar.“

Hann hefði aldrei litið svo á að uppreist æru væri annað en lagalegt úrræði fyrir dæmda brotamenn til að öðlast að nýju tiltekin borgaraleg réttindi. Sá hugur hafi ekki búið i að baki að rétta stöðu Hjalta gagnvart fórnarlambi hans. Hann hafi sagt Hjalta að horfast í augu við gjörðir sínar og iðrast þeirra

„Það sem átti hér að vera lítið góðverk við dæmdan mann hefur snúist upp í framhald harmleiks brotaþola. Á því biðst ég enn og aftur afsökunar.“

Viðtalið við Andrés Jónsson í Reykjavík síðdegis má heyra hér að neðan.

Finnst Benedikt hafa brugðist rétt við

Andrés Jónsson almannatengill segir mikilvægast í þeirri erfiðu stöðu sem Benedikt hafi verið kominn í að biðjast afsökunar. Enginn sé að saka hann né son hans um neitt saknæmt. Það fari illa í fólk í slíkum afsökunarbeiðnum ef settir eru varnaglar, „sorry, not so sorry“ eins og Andrés komst að orði í spjalli við Reykjavík Síðdegis á Bylgjunni í dag.

„Það er eins með þetta mál eins og önnur sem valda reiði. Það sem er mesti vandinn er að svara fyrir reiðina. Ekki svara því sem houm þykir vera ósanngjarnt. Faðir forsætisráðherra eða forsætisráðherra hafa ekki fram neinn glæp. En þeir eru röngu megin við þá gagnrýni sem verið hefur á þetta kerfi.“

Benedikt segist í yfirlýsingunni ekki vilja veita viðtöl vegna málsins. Andrés segir að í yfirlýsingunni svari Benedikt mikilvægum spurningum.

„Vissi Bjarni Benediktsson sonur þinn af þessu? Var dómsmálaráðuneytið tregara til að veita upplýsingar af því þau vissu af þessu? Ég myndi segja að hann hafi brugðist rétt við,“ segir Andrés.

Þá sagði Andrés málið sérstaklega óþægilegt fyrir sjálfstæðisflokkinn enda kominn flokkspólitískur blær á það. Sérstaklega í ljósi þess að þingmenn flokksins í allsherjarnefnd vildu ekki kynna sér gögn er sneru að uppreist æru annars dæmds kynferðisbrotamanns, Roberts Downey, í ágúst.

Pólitískir skandalar væru í flestum tilvikum ekki til komnir vegna mistaka stjórnmálamanna heldur viðbragða þeirra við slíkum málum.