Drepfyndin sagnfræði með ádeilu og söngvum

Þetta er sagnfræðisöngleikur eftir dúettinn Hund í óskilum, þá Eirík Stephensen og Hjörleif Hjartarson. Drepfyndinn að sjálfsögðu því þeir eru snillingar í að lesa tíðarandann og tala beint til þjóðarsálarinnar,“ segir Ágústa Skúladóttir leikstjóri um sýninguna Kvenfólk sem Leikfélag Akureyrar frumsýnir annað kvöld í Samkomuhúsinu.

Ágústa kveðst afskaplega stolt af því að hafa verið valin til vera hlýðniþjálfari þeirra Eiríks og Hjörleifs á sviðinu. „Það er sko bara gaman,“ segir hún sannfærandi.

 

„Það er líka dásamlegt að tveir miðaldra karlmenn hafi fundið hjá sér þörf til að koma sögu kvenna og kvennabaráttu til skila. Hún var vanrækt öldum saman og það urðu þeir félagar illilega varir við þegar þeir unnu að Sögu þjóðar sem fékk Grímuverðlaun á sínum tíma. Nú velta þeir við hverjum steini og grafa upp ýmislegt óvænt og skemmtilegt í sögu jafnréttisbaráttunnar.“

Sýningin Kvenfólk er hárbeitt ádeila að sögn Ágústu. „Þar eru slegin kjaftshögg og valdir margir mikilvægir punktar í sögunni enda kemur drifkraftur höfundanna frá þeirri sannfæringu að femínisminn sé þýðingarmesta hugmynd og félagslega hreyfing sem komið hefur fram á síðustu öldum. Þess vegna er sýningin áríðandi skilaboð til fólks í dag því eins og segir á Vísindavefnum er femínisti karl eða kona sem veit að jafnrétti kynjanna hefur ekki verið náð og vill gera eitthvað í því. Þeim kyndli þarf að halda á lofti og það gera Hjörleifur og Eiríkur með sínum einstaka frásagnarhætti í tali og tónum.“