„Lítt markvert veður í vændum“

Veðurstofan varar við áframhaldandi vatnavöxtum á annesjum á Norðurlandi og þá sé þar aukin hætta á skriðuföllum. Einnig er búist við talsverðri eða mikilli rigningu eða slyddu á utanverðum Tröllaskaga um tíma í nótt.

Þá verður úrkomusamt næsta sólarhringinn fyrir norðan á meðan um landið sunnan- og austanvert verður ágætis veður. Þótt ekki verði alveg samfelld rigning norðantil í dag, mun rigna nokkuð hressilega, einkum við ströndina.

Lægðin sem þessu veldur mun svo fara af stað til austurs í kvöld og síðan halda til norðausturs. Vindstrengurinn frá henni mun ná inn á norðanvert landið ásamt úrkomuskilum. Þá mun kólna og því gæti náð að „slydda í byggð einnig,“ eins og það er orðað á vef Veðurstofunnar.

„Einna helst er að sjá að austanverður Skagafjörður og Fljót fái mesta úrkomu í nótt en annars er úrkoman einkum bundin við annesin fyrir norðan. Fyrir hádegi á morgun, laugardag verða síðan skilin og vindstrengurinn kominn austur af landinu og lítt markvert veður í vændum fram yfir helgi,“ segir þar jafnframt.

Veðurhorfur á landinu næstu daga

Á laugardag:

Vestan og norðvestan 8-15 m/s, en 15-20 við N-ströndina fram eftir degi. Rigning eða slydda um landið norðanvert, en bjart með köflum sunnantil. Lægir og léttir til NV-til seinnipartinn, en um landið NA-vert um kvöldið. Hiti 1 til 8 stig, hlýjast á Suðausturlandi.

Á sunnudag og mánudag:

Hæg breytileg átt, en lengst af V 5-10 við NA-ströndina. Bjart með köflum, en lítilsháttar úrkoma vestantil. Hiti 2 til 7 stig yfir daginn, en líkur á næturfrosti, einkum inn til landsins.

Á þriðjudag:

Vaxandi suðaustanátt, fyrst suðvestantil. Suðaustan 8-18 um kvöldið, hvassast og rigning við S-ströndina. Hiti 0 til 5 stig N- og A-til, en 3 til 8 annars.

Á miðvikudag:

Ákveðin austlæg átt en mun hægari seinnipartinn. Rigningu um mest allt land og hiti 2 til 8 stig.

Á fimmtudag:

Útlit fyrir suðlæga átt og yfirleitt þurrt, en norðaustanátt og rigning NV-til. Hiti 1 til 8 stig, mildast syðst.