Fengu sér alltaf vískískot fyrir leiki

Fyrrum leikmenn Washington Redskins hafa viðurkennt að það hafi verið hefð hjá þeim að taka eitt vískiskot fyrir alla leiki.

Þetta eru þeir Santana Moss, Clinton Portis og Sean Taylor sem nú er látinn.

„Þetta var bara eitt skot. Við vorum ekkert að detta í það. Bara upp á adrenalínið. Við gerðum þetta í eitt og hálft ár án þess að nokkur vissi af því,“ sagði Portis en hann heldur því fram að hann hafi spilað einn af bestu leikjum ferilsins skelþunnur.

„Liðin dæla í okkur alls konar verkjalyfjum en ég vildi frekar taka bara eitt skot fyrir leik. Svo fer maður út á völl, drekkur Gatorade og málið búið. Þetta fannst mér vera betri leið en að vera með líkamann fullan af alls konar drasli sem læknarnir gáfu leikmönnum.“