Vilja lengja nýju Vestmannaeyjaferjuna en afhending gæti tafist

Skipasmíðastöðin CRIST S.A. í Póllandi hefur lagt til að lengja nýju Vestmannaeyjaferjuna um 1,8 metra og breyta stefninu. Með því móti tekst að halda djúpristunni innan þeirra marka sem að var stefnt. Samkvæmt upplýsingum frá Vegagerðinni verður aðstaða fyrir farþega betri við þessar breytingar og ferjan getur að jafnaði flutt fleiri fólksbíla.

„Þessar breytingar eru verkkaupa að kostnaðarlausu en verða þess valdandi að afhending dregst eitthvað. Þessi tillaga skipasmíðastöðvarinnar er enn til skoðunar hjá samgönguráðuneytinu og Vegagerðinni. Ákvörðun verður tekin fljótlega,“ segir í frétt á vef Vegagerðarinnar.

Gerðar eru afar stífar kröfur um djúpristu nýju ferjunnar til að auðvelda siglingar í Landeyjahöfn. Samkvæmt Vegagerðinni þýðir þetta að fylgst er vel með þyngd ferjunnar og stöðugleikanum og gripið til ráðstafana ef frávik verður. Að mati skipasmíðastöðvarinnar í Póllandi verður ferjan að óbreyttu of þung og því leggur hún til að lengja nýju ferjuna lítillega og breyta stefninu. Samkvæmt útboðinu á að skila ferjunni tilbúinni í júlí árið 2018 en verði ferjan lengd gæti það orðið seinna um sumarið.