Svakalegt Stjörnuhrap: Búnar að tapa fleiri leikjum í deildinni en allt síðasta tímabil

Stjarnan tapaði með átta mörkum, 33-25, fyrir toppliði Vals í Olís-deild kvenna í handbolta í gærkvöldi, en Stjörnukonur voru fjórum mörkum undir í hálfleik, 18-14.

Þetta var annað tap Stjörnunnar í röð og það fimmta í tíu leikjum í deildinni, en liðið er aðeins búið að vinna fjóra leiki af fyrstu tíu og er í fimmta sæti með níu stig. Ef deildinni myndi ljúka í dag kæmist Stjarnan ekki í úrslitakeppnina sem yrðu ævintýraleg vonbrigði fyrir liðið sem margir, ef ekki flestir, spáðu Íslandsmeistaratitlinum.

Stjörnuliðið tapaði aðeins þremur leikjum af 21 í Olís-deildinni á síðustu leiktíð og stóð uppi sem deildarmeistari auk þess sem liðið varð bikarmeistari. Það tapaði svo fyrir Fram í lokaúrslitum Íslandsmótsins og missti þannig af Íslandsmeistaratitlinum. Töpin eru því fleiri í tíu deildarleikjum í vetur en allt síðasta tímabil.

Stjarnan missti sterka leikmenn í Helenu Rut Örvarsdóttur og Hafdísi Renötudóttur en fylltu í skarðið með stórskyttunni Ramune Pekarskyte og Dröfn Haraldsdóttur. Garðabæjarliðið bætti svo við sig landsliðskonunni Þórey Önnu Ásgeirsdóttur og tók stefnuna á Íslandsmeistaratitilinn.

Liðið hefur spilað langt undir væntingum og aðeins náð þremur stigum í baráttunni við fjögur efstu liðin. Stjarnan vann Hauka í þriðju umferð Olís-deildarinnar og gerði jafntefli í stórleiknum við Fram í annarri umferð en síðan þá hefur Stjarnan bara unnið Selfoss, Fjölni og Gróttu sem eru einu liðin fyrir neðan Stjörnuna.

Í fjórum leikjum á móti liðunum í fjórum efstu sætunum (ÍBV, Haukum og Val x2) síðan Stjarnan vann Hauka í þriðju umferð hafa Garðabæjarstúlkur ekki fengið eitt einasta stig. Þær verða svo fimm stigum frá sæti í úrslitakeppninni vinni ÍBV sigur á Gróttu í kvöld sem verður að teljast ansi líklegt.

Stjarnan komst þó áfram í átta liða úrslit Coca Cola-bikarsins með sigri á Valsliðinu sem er búið að leggja það tvívegis í deildinni.

Stjarnan mætir næst botnliði Gróttu í beinni útsendingu á Stöð 2 Sport HD klukkan 18.00 á sunnudagskvöldið.