Kúrekarnir missa af úrslitakeppninni

Þrjú lið bættust í gærkvöldi í hóp þeirra sem eru komin áfram í úrslitakeppni NFL-deildarinnar en flestir leikir sextándu og næstsíðustu umferðar tímabilsins fóru fram í gærkvöldi.

LA Rams, Kansas City Chiefs og Carolina Panthers unnu öll sína leiki og eru þar með komin áfram í úrslitakeppnina. Dallas Cowboys er hins vegar úr leik eftir tap fyrir Seattle Seahawks.

Dallas hafði unnið þrjá leiki í röð og endurheimti hlauparann Ezekiel Elliott eftir sex leikja bann fyrir leikinn í gær. Elliott stóð fyrir sínu og var með meira en 100 jarda í leiknum en að öðru leyti var sókn Dallas ekki sannfærandi.

Dallas skoraði öll sín stig með vallarmörkum en leikstjórnandinn Dak Prescott kastaði boltanum tvívegis í hendur varnarmanna Seattle, þar af einu sinni á Justin Coleman sem þakkaði fyrir sig með því að skora snertimark.

Russell Wilson, leikstjórnandi Seattle, hefur verið frábær á leiktíðinni en þrátt fyrir að hann hafi skorað tvö snertimörk í leiknum kláraði hann aðeins fjórtán sendingar í leiknum og komst ekki yfir 100 sendingajarda.

Tapið þýðir að Dallas er úr leik en sigur Seattle þýðir að liðið á enn möguleika á að komast í úrslitakeppnina. Til þess þarf liðið að vinna Arizona Cardinals á gamlárskvöld og treysta á hagstæð úrslit í öðrum leikjum

Seattle á þó engan möguleika á að vinna sinn riðil, vesturriðil Þjóðardeildarinnar, þar sem að LA Rams tryggði sér sigur í riðlinum með sigri á Tennessee Titans, 27-23. Þetta var í fyrsta sinn síðan 2003 að Rams vann riðilinn og er mikill sigur fyrir þjálfarann Sean McVay sem tók við liðinu í janúar. McVay er aðeins 31 árs og yngsti aðalþjálfari NFL-liðs í sögu deildarinnar.

McVay hélt skemmtilega ræðu í búningsklefanum eftir leik og brutust út mikil fagnaðarlæti er hann gaf leikmönnum frí til miðvikudags.

There’s only one thing you can say...

WOOOOOOOOO!! pic.twitter.com/r4a2qbub5w

— Los Angeles Rams (@RamsNFL) December 24, 2017

Hlauparinn Todd Gurley hefur verið engum líkur síðustu vikurnar í liði Rams og sýndi í gær að hann kemur vel til greina í valinu um besta [e. MVP] leikmann deildarinnar. Gurley var með 276 jarda og tvö snertimörk í leiknum - ótrúlegar tölur.

New England Patriots vann Buffalo Bills, 37-16, en leikurinn var jafnari en tölurnar gefa til kynna. Staðan að loknum fyrri hálfleik var jöfn, 13-13, eftir að dómari leiksins tók þá umdeildu ákvörðun að dæma snertimark Kelvin Benjamin, útherja Buffalo, ógilt.

Buffalo jafnaði sig ekki og eftirleikurinn var auðveldur fyrir Patriots, sem tryggir sér heimavallarrétt í úrslitakeppninni með sigri í lokaumferðinni - eða ef Pittsburgh tapar fyrir Houston í kvöld. Sá leikur er í beinni útsendingu á Stöð 2 Sport klukkan 21.25 í kvöld.

Meðal annarra úrslita má nefna að Green Bay Packers skoraði ekki stig gegn Minnesota en liðið er án leikstjórnandans Aaron Rodgers sem var aftur settur á meiðslalista félagsins eftir að ljóst varð að liðið myndi ekki komast í úrslitakeppnina.

Cleveland Browns er enn án sigurs eftir tap gegn Chicago Bears og er liðið þar með öruggt með að fá fyrsta valréttinn í nýliðavali deildarinnar næsta vor.

Hér má sjá hvaða lið eru komin áfram í úrslitakeppnina og hvaða lið eiga enn möguleika á að komast í hana í lokaumferðinni á gamlárskvöld.

Úrslit helgarinnar:

Baltimore - Indianapolis 23-16

Green Bay - Minnesota 0-16

Cincinnati - Detroit 26-17

Kansas City - Miami 29-13

New England - Buffalo 37-16

Chicago - Cleveland 20-3

Carolina - Tampa Bay 22-19

New Orleans - Atlanta 23-13

Washington - Denver 27-11

Tennessee - LA Rams 23-27

NY Jets - LA Chargers 7-14

San Francisco - Jacksonville 44-33

Dallas - Seattle 12-21

Arizona - NY Giants 23-0