NFL úrslitakeppnin farin af stað: Leikstjórnandi Títana greip sína eigin sendingu í endurkomusigri

Óhætt er að segja að hin svokallaða „Wild card“ helgi í úrslitakeppni NFL – deildarinnar fari vel af stað.

Fyrstu tveir leikir helgarinnar voru spilaðir í gær og litu óvænt úrslit dagsins ljós í þeim báðum.

Í fyrri leik kvöldsins tóku Höfðingjarnir í Kansas á móti Títönunum frá Tennesee. Smelltu hér til að sjá samantekt úr leiknum á YouTube-rás NFL - deildarinnar.

Flestir spekingar fyrir vestan haf töldu það aðeins vera formsatriði fyrir Höfðingjana að klára leikinn og halda áfram í næstu umferð.

Eftir fyrsta leikhluta leiksins leit út fyrir að sú spá myndi rætast, en Höfðingjarnir leiddu 14-0 að honum loknum. Vörn Títana var eins og gatasigt og var útlit fyrir að Höfðingjar færu með stórsigur þegar liðin gengu til búningsherbergja, staðan 21-3.

Sú varð hins vegar aldeilis ekki raunin. Títanar héldu Höfðingjunum skorlausum í seinni hálfleik og fóru af hólmi með frábæran og vægast sagt óvæntan endurkomusigur, 22-21.

Marcus Mariota, leikstjórnandi liðsins, lék á alls oddi í seinni hálfleik og gekk allt upp hjá honum, eins og sést hér að neðan.

Marcus Mariota just caught his own pass for a @Titans TD!!

Not a typo.#TitanUp#NFLPlayoffspic.twitter.com/bDBVukfZuY

— NFL (@NFL) January 6, 2018

 



Var þetta í fyrsta skipti í rúmlega 20 ár sem að leikmaður í NFL – deildinni skorar snertimark með því að grípa sína eigin sendingu.

Höfðingjarnir trúðu vart eigin augum í lok leiks. Leikstjórnandi þeirra, Alex Smith, sem kastaði fyrir 235 jördum í fyrri hálfleik, það næst mesta í sögu úrslitakeppni NFL, náði sér engan veginn á strik í þeim síðari. Virtist hann óöruggur í öllum sínum aðgerðum og kastaði hann fyrir tveimur mínusjördum í þriðja leikhluta.

Vó þar þungt að liðsfélagi hans og einn besti innherji deildarinnar (e. Tight end), Travis Kelce, þurfti að yfirgefa völlinn í lok fyrri hálfleiks með heilahristing, eftir óhugnalegt höfuðhögg.

Óvænt úrslit litu einnig dagsins ljós í borg englanna, þar sem Hrútarnir tóku á móti Fálkunum frá Atlanta. Smelltu hér til að sjá samantekt úr leiknum.

Lið Hrútanna var fyrir leikinn talið líklegra til að fara með sigur, en liðið vann vesturriðil Þjóðardeildarinnar og skoraði flest stig allra liða í NFL – deildinni þetta tímabil.

Þeir mættu hins vegar ofjörlum sínum í nótt. Fálkarnir keyrðu yfir þá strax í byrjun og náðu 13-0 stiga forskoti í fyrsta leikhluta, eftir dýrkeypt mistök Pharoh Cooper í sérliði Hrútanna. Missti hann boltann tvívegis klaufalega frá sér og fengu Fálkarnir góða vallarstöðu af þeim sökum.

Sóknarvél Hrútanna hrökk í gang í lok fyrri hálfleiks og minnkuðu þeir muninn í 13-10, áður en að liðin gengu til búningsherbergja í hálfleik.

Þetta voru hins vegar síðustu stig Hrútanna í leiknum. Lítið sem ekkert gekk í sóknarleik þeirra í síðari hálfleik og gengu Fálkarnir á lagið. Fálkarnir innsigluðu sigurinn þegar að rúmlega fimm mínútur voru eftir af leiknum. Fann leikstjórnandi liðsins, Matt Ryan, Julio Jones í endamarkinu og var ekki aftur snúið fyrir Hrútana.

Lokatölur 26-13 og halda Fálkarnir næst til Fíladelfíu þar sem liðið mætir Örnunum næstkomandi laugardag í slag ránfuglanna.

 

.@AtlantaFalcons vs. @Eagles in the Divisional Round.

See you next Saturday. #ATLvsPHI#NFLPlayoffspic.twitter.com/ThxKWy9YXQ

— NFL (@NFL) January 7, 2018