Elliði tilbúinn í fyrsta prófkjör í Eyjum í 28 ár

Fulltrúaráð Sjálfstæðisfélagsins í Vestmannaeyjum felldi skömmu fyrir áramót tillögu um að stillt yrði upp á framboðslista Sjálfstæðisflokksins fyrir komandi sveitarstjórnarkosningar.

Aníta Óðinsdóttir, formaður fulltrúaráðsins, segir að ráðið muni því á næstunni kjósa um hvort valið verði á listann með prófkjöri. Nái sú tillaga ekki fram að ganga verði kosning kjörnefndar þrautalendingin.

Elliði Vignisson, oddviti flokksins, sem hefur verið bæjarstjóri í tólf ár, hefur lýst því yfir að hann gefi kost á sér áfram og hvikar hvergi frá því þótt tillagan um uppstillingu hafi verið felld.

„Ég gef kost á mér sama hvaða leið verður farin og er nú uppteknari af því hvernig við vinnum kosningar frekar en hvaða aðferð er notuð til þess að stilla upp lista.“ Elliði segist aðspurður ekki vera kominn í neinn sérstakan prófkjörsham strax. Hann bíði einfaldlega rólegur eftir lokaniðurstöðunni.

Elliði lýsti því yfir í desember að hann gæfi kost á sér áfram. Hann sagðist þá, á undanförnum mánuðum, hafa verið þráspurður hvort hann myndi sækjast eftir endurkjöri.

Eftir að hafa ráðfært sig við fjölskyldu, vini og samstarfsfólk tók hann ákvörðun „um að láta reyna á hvort ég hafi áfram traust Eyjamanna til að vinna sveitarfélaginu gagn“.

Sjálfstæðisfólk í Vestmannaeyjum var síðast með prófkjör árið 1990, fyrir 28 árum.