Ólafía á enn möguleika

Ólafía Þórunn Kristinsdóttir á enn möguleika á að komast áfram á lokahring Pure Silk LPGA-mótsins sem fer á Bahama-eyjum þessa helgina.

Afar vindasamt hefur verið á eyjunum um helgina og þurfti að fresta leik á föstudagsmorgun og var ekki hægt að hefja leik á ný fyrr en um miðjan dag í gær.

Kylfingar fóru því síðar út en áætlað var og var Ólafía í hópi þeirra kylfinga sem náðu ekki að klára. Hún var búin með tólf holur þegar leik var aflýst og var þá á fjórum höggum yfir pari, átta yfir samtals.

Hún átti fremur erfitt uppdráttar eins og fleiri í gær. Hún hóf leik á tíundu holu og byrjaði á að fá skolla á fyrstu tveimur holunum og fjórum alls á fyrri níu holunum sínum.

Hún fékk skolla á annarri holu, sinni elleftu, en lauk svo deginum á jákvæðum nótum er hún náði sér í eina fugl dagsins á þriðju holu.

Hún er sem stendur í 83.-90. sæti en efstu 70 kylfingarnir komast áfram og fá að keppa á lokahringnum í dag. Þeir kylfingar sem áttu eftir að ljúka keppni í gær hefja leik í dag klukkan 13.00.

Bein útsending frá mótinu hefst á Stöð 2 Sport 4 klukkan 20.00.