Tiger á pari í endurkomunni | Myndband

Tiger Woods sneri aftur á golfvöllinn í gærkvöldi eftir tíu mánaða fjarveru en hann er á meðal keppenda á Farmers Insurance-mótinu.

Mótið er hluti af PGA-mótaröðinni en hann hefur ekki keppt á móti á þeirri mótaröð í eitt ár. Spennan hefur verið mikil að sjá hann aftur spila eins og alltaf þegar að hann sveiflar golfkylfunni.

Tiger spilaði fyrsta hringinn á pari en hann er sjö höggum á eftir efsta manni sem er Bandaríkjamaðurinn Tony Finau.

„Ég var líklega svolítið ryðgaður en það var gaman að keppa aftur,“ sagði Tiger sem náði þremur fuglum en fékk á móti þrjá skolla.

„Ég finn enn þá fyrir sömu spennunni þegar ég er að fara að spila. Ég var samt ekki að slá neitt sérstaklega vel og kom mér ekki í mörg fuglafæri,“ sagði Tiger Woods.