Bein út­sending: Ný per­sónu­verndar­lög­gjöf - Í hverju felast breytingarnar?

Orator, félag laganema við Háskóla Íslands, í samstarfi við ELSA Ísland, stendur fyrir málþingi miðvikudaginn 31. janúar 2018 í stofu HT-102 á Háskólatorgi, Háskóla Íslands.

Yfirskrift málþingsins að þessu sinni er „Ný persónuverndarlöggjöf - Í hverju felast breytingarnar?“ en þann 27. apríl 2016 skrifuðu forsetar Evrópuþingsins og -ráðsins undir nýja evrópska persónuverndarlöggjöf sem mun taka gildi þann 25. maí n.k. í Evrópu. Þær endurbætur á evrópskri persónuverndarlöggjöf sem um ræðir fela m.a. í sér reglugerð um vernd einstaklinga í tengslum við vinnslu persónuupplýsinga og frjálst flæði slíkra upplýsinga.

Á ensku nefnist reglugerðin General Data Protection Regulation, e. GDPR. Vernd persónuupplýsinga er talin hluti af EES samningnum og mun löggjöfin því verða tekin upp í íslenskan rétt, að undangenginni þinglegri meðferð. Um er að ræða umfangsmestu breytingar sem gerðar hafa verið á persónuverndarlöggjöfinni í tvo áratugi.

Framsögumenn á málþinginu verða:



Björg Thorarensen, formaður stjórnar Persónuverndar og prófessor við Háskóla Íslands. Björg hefur farið fyrir frumvarpsvinnu nýju laganna og mun í erindi sínu fjalla um þær breytingar sem reglugerðin hefur í för með sér og hvernig þær verða innleiddar í íslenskan rétt.

Davíð Þorláksson, lögmaður og forstöðumaður samkeppnishæfnisviðs Samtaka atvinnulífsins. Í erindi sínu mun Davíð lýsa sjónarmiðum atvinnulífsins varðandi löggjöfina, þeim vanköntum sem kunna að vera uppi varðandi innleiðingarferlið og fjalla almennt um innleiðingar á EES gerðum.

Salka Sól Styrmisdóttir, lögfræðingur hjá Landslögum. Í erindi sínu mun Salka fara stuttlega yfir þær breytingar á reglugerðinni sem hafa mestar afleiðingar í för með sér fyrir fyrirtæki og opinberar stofnanir og einnig mun hún fjalla um svokallaða GDPR ráðgjöf sem lögmannsstofur og lögfræðingar hafa verið að þjónusta fyrirtæki og opinberar stofnanir með undanfarin misseri.

Að framsögum loknum verður opnað fyrir spurningar úr sal og af Twitter #oratorxelsa

Fundarstjóri verður Lísbet Sigurðardóttir, funda- og menningarmálastjóri Orators.