Tíðir eftirskjálftar á Taívan

Tíðir eftirskjálftar hafa verið í alla nótt á Taívan eftir að gríðarlega öflugur skjálfti upp á 6,4 stig reið þar yfir síðdegis í gær að íslenskum tíma. BBC greinir frá málinu.

Fjöldi bygginga í borginni Hualien eru mikið skemmdar og hingað til er vitað um fjóra sem létu lífið en um tvö hundruð slösuðust í hamförunum.

Óttast er að tala látinna geti hækkað verulega, en í einni byggingu sem hrundi voru 140 manns sem enn hefur ekki náðst samband við.

Hualien er vinsæll ferðamannastaður en þar búa að jafnaði um hundrað þúsund manns.