Minnist Justin Timberlake á Trump? Skemmtilegu hliðarveðmálin sem tengjast Ofurskálinni

Eins og fjallað hefur verið um á Vísi er úrslitaleikur NFL-deildarinnar, Ofurskálin (e. Superbowl) í kvöld og að vanda eru veðmálasíður að bjóða upp á ýmsa skemmtilega möguleika.

Rétt eins og hjá Lengjunni er hægt að veðja á sigurvegara leiksins þar sem New England Patriots teljast líklegri enda sagan með þeim í liði eins og fjallað var um hér og hér. Þá spáði hvolpasveit Jimmy Fallon Patriots sigri eins og sjá má hér.

Hægt giska á hvaða leikmaður verður valinn mikilvægasti leikmaður leiksins (e. Most Valuable Player), hversu marga jarda menn fara og hver kastar fyrir fyrsta snertimarkinu en það er einnig boðið upp á skemmtileg hliðarveðmál.

Þannig má veðja á hversu lengi Pink verður að syngja þjóðsöngin fyrir leik, hvort hún gleymi eða sleppi einhverju orði í þjóðsöngnum, hvort hún verði í fatnaði tengdum Philadelphia Eagles og hvaða hárlit hún verður með þegar hún mætir á sviðið.

Líklegast þykir að hún verði lengur en tvær mínútur og með hvítt hár en ólíklegt þykir að hún mæti með grænt eða blátt hár.

Hægt er að veðja hverjum verðmætasti leikmaður kvöldsins þakkar fyrst í viðtölum eftir leik þar sem hann þykir líklegastur til að þakka Guði eða liðsfélögum sínum.

Justin Timberlake sér um hálfleiksskemmtunina í Minnesota í kvöld en yfirleitt eru góðir gestir sem taka þátt í sýningunni.

Finnst veðbönkum ekki ólíklegt að fyrrum strákabandið NSYNC sjáist saman á sviðinu á einhverjum tímapunkti en fyrrum meðlimir sveitarinnar hafa tekið fyrir það á undanförnum vikum.

Ekki er talið líklegt að Janet Jackson fái að syngja aftur með Justin en þá er hægt að veðja hvort það muni aftur sjáist í geirvörtu eða hvort það muni sjást í kynfæri á meðan sýningunni stendur.

Veðbankar telja líklegast að hann byrji á Cant Stop the Feeling en þeim finnst ekkert útilokað að Justin muni minnast á forseta Bandaríkjanna, Donald Trump, á meðan sýningunni stendur.

Þá má veðja á hvort rafmagnið fari af höllinni á einhverjum tímapukti eins og gerðist í Superbowl 47 eða hvaða litur verður á vökvanum sem verður sturtað yfir þjálfara sigurliðsins þegar sigurinn er í höfn.

Að lokum er hægt að veðja að treyju Tom Brady verði stolið úr búningsklefanum en eins og frægt er stal blaðamaður frá Mexíkó treyju hans eftir Ofurskálarleikinn í fyrra.