Minna rask á Teigsskógi og stærri brýr yfir firði

Vegagerðin hefur breytt hönnun vegar um Teigsskóg í nokkrum vegamiklum atriðum frá upphaflegri tillögu. Þannig er núna gert ráð fyrir að skerðing skóglendis verði innan við þrjú prósent og að brýr yfir firði verði stærri til að hleypa sjávarföllum betur í gegn. Þetta kom fram í fréttum Stöðvar 2.

Hreppsnefnd Reykhólahrepps samþykkti með fjórum atkvæðum gegn einu í gær að framtíðarlega Vestfjarðavegar skuli vera um Teigsskóg en hafnaði um leið göngum undir Hjallaháls. Loftmyndin sýnir firðina þrjá og nesin, sem vegurinn mun liggja um, en deilan snýst ekki aðeins um skóglendi heldur einnig um fjarðaþveranir.

Með veglínu um Teigsskóg færist vegurinn af hálsunum og verður allur á láglendi en jafnframt fæst 22 kílómetra stytting. Athygli vekur í tillögu Vegagerðarinnar að leiðin, sem nú er áformað að setja á aðalskipulag, er talsvert frábrugðin þeirri tillögu sem rætt var um fyrir nokkrum árum. 

Fyrirhuguð brú yfir Gufufjörð hefur verið lengd úr 120 metrum upp í 130 metra, brú yfir Djúpafjörð lengist úr 182 metrum upp í 300 metra og brú yfir Þorskafjörð fer úr 182 metrum upp í 260 metra, í því skyni að draga sem mest úr straumhraða undir brýrnar.

Þá gerði fyrri veglína ráð fyrir að 7,5 prósentum af skógarþekju, eða 50 hekturum, yrði raskað en ný veglína þýðir að 2,8 prósentum verður raskað, eða 19 hekturum. Fyrri hugmynd gerði ráð fyrir að vegurinn lægi í gegnum skóginn á 6 kílómetra kafla en nú er gert ráð fyrir að 2,15 kílómetrar verði í gegnum skóglendi. 

Vegagerðin áætlar núna að leiðin um Teigsskóg kosti 7,3 milljarða króna en jarðgangaleið undir Hjallaháls kosti 13,3 milljarða króna. Þessi sex milljarða króna kostnaðarmunur er að mati sveitarstjórnar slíkur að hann sé líklegur til að hafa afgerandi áhrif á tímasetningar samgöngubóta. 

 

Í bókun sveitarstjórnar er dregið fram að leið um Teigsskóg auki umferðaröryggi meira heldur en jarðgangaleiðin, en það er mat Vegagerðarinnar. Þar munar miklu að, þrátt fyrir göng undir Hjallaháls, yrði áfram gert ráð fyrir vegi yfir Ódrjúgsháls sem færi í 168 metra hæð yfir sjávarmáli og kallaði á meiri brekkur. 

Í beinni útsendingu Stöðvar 2 í gærkvöldi eftir fund hreppsnefndarinnar kvaðst Ingibjörg Birna Erlingsdóttir, sveitarstjóri Reykhólahrepps, vonast til að framkvæmdir hæfust í haust. 

„Ef allt gengur að óskum ætti að vera hægt að veita framkvæmdaleyfi bara núna á fyrstu haustdögum,” sagði sveitarstjórinn. 

Hér má sjá frétt Stöðvar 2 í kvöld: