Leikskólabörn á leiðinni á HM

Fjórar stelpur af leikskólanum Laufásborg eru á leið á heimsmeistaramót barna í skák sem haldið verður í Albaníu í vor. Þetta er í fyrsta sinn sem leikskólabörn taka þátt á mótinu.

Skákáhuginn er mikill á leikskólanum Laufásborg og segir skákkennari að árangurinn sé afrakstur af öflugu starfi á síðustu tíu árum. Alvaran hófst þó í fyrra þegar leikskólinn fékk undanþágu til að taka þátt í Íslandsmóti barnaskólasveita, sem er grunnskólamót.

„Við vildum bara taka þátt og vera með. Það er ekki til leikskólamót en við fengum leyfi til að vera með í grunnskólamótinu og það gekk svakalega vel. Svo eftir það var næsta skref bara að prófa að fara á HM og vera með þar," segir Omar Salama, skákkennari.

Í skáksveit Laufásborgar eru fjórar stelpur sem eru fimm og sex ára gamlar. Þær æfa nú tvisvar á dag og eru spenntar fyrir komandi tímum, enda í fyrsta sinn sem leikskólabörn fara á HM.

Hvað finnst ykkur um skák?  „Bara æðislegt," segir hin fimm ára gamla Inga Jóna sem. „Mér finnst gaman í skák," Urður Katrín og tekur undir.

Þær eiga ekki í vandræðum með að benda á það skemmtilegasta við skákina og segja að sigurinn sé sætastur.

Eruð þið að fara á heimsmeistaramót?  „Já í Albaníu og við erum að fara keppa við önnur börn sem búa í öðrum löndum," segir Inga Jóna. 

Þær segja leyndarmálið að baki valgengninni ekki flókið. „Maður einbeitir sér og hrókarar. Og notar tímann sinn," segir Rebekka Ocares að lokum.