Íslandsmeistararnir enduðu á sigri

Íslandsmeistarar Þór/KA sigruðu FH á Akureyri í dag þegar liðin mættust í Lengjubikar kvenna.

Margrét Árnadóttir kom heimakonum yfir strax á 17. mínútu og Anna Rakel Pétursdóttir náði að tvöfalda forystuna áður en liðin gengu til búningsherbergja með marki úr vítaspyrnu.

Hulda Ósk Jónsdóttir gulltryggði svo sigur Þórs/KA í seinni hálfleik og þrátt fyrir að Marjani Hing-Glover næði að minnka muninn í 3-1 var það of seint og Þór/KA fór með sigur.

Leikurinn í dag var sá fyrsti í síðustu umferð A-deildar Lengjubikarsins. Þór/KA fór með sigrinum upp í þriðja sætið með sjö stig. FH er með þrjú stig í fimmta sæti.