„Vita aldrei hvort systkinið komi heim aftur lifandi“

Foreldrar pilts á átjánda ári sendu opið bréf á alla þingmenn í dag þar sem þau benda á misbresti í barnaverndarkerfinu. Sonur þeirra hefur verið í miklum vímuefnavanda síðustu fjögur ár.

„Okkar barn hefði þurft aðstoð en ekki geymslu eins og mörg þessi úrræði eru. Það er frábært starfsfólk í kerfinu sem eru því miður að vinna í kerfi sem erfitt er að vinna í. Við erum að blanda saman börnum með ólíkar þarfir og ólík vandamál og blanda saman börnum frá tólf til átján ára, sem eiga enga samleið," segir Sigvaldi Sigurbjörnsson, faðir piltsins.

Hann segir síðustu fjögur ár hafa verið afar erfið og að fleiri líf séu í húfi en barnsins sem sé í vanda, enda taki úrræðaleysi sinn toll af allri fjölskyldunni.

„Sérstaklega á systkinin. Þau vita aldrei hvort systkini sitt komi heim aftur, lifandi.“

Í bréfinu gagnrýna foreldrarnir Barnaverndarstofu harðlega og úrræðaleysi þar en í fréttum síðustu daga hefur verið sagt frá því að átta af tíu meðferðarheimilum hafi lokað á síðustu árum.

Það er þó ekki alveg rétt. Á síðustu 18 árum hefur meðferðarheimilum sannarlega fækkað, úr níu í þrjú. Halldór Hauksson, sviðsstjóri meðferðar- og fóstursviðs hjá Barnaverndarstofu, segir fækkunina einfaldlega skýrast af minni eftirspurn. Það sé til að mynda laus pláss á tveimur meðferðarheimilum úti á landi í dag þrátt fyrir að það sé yfirfullt á neyðarvistun Stuðla.

„Við hörmum það mjög að hafa þurft að vísa börnum frá neyðarvistuninni og við erum núna að fara yfir það með Stuðlum og barnaverndarnefndum hvenær sé verið að vista endurtekið sömu börn, börn sem gætu fengið vistun á meðferðarheimili,“ segir Halldór.

„Af einhverjum ástæðum dregur annað hvort úr áhuga barnaverndarnefnda á að sækjast eftir plássum á meðferðarheimilum eða að þau komast ekki yfir það að vinna málin til enda. Við vitum það ekki.“

Strandar á lóðinni

Um 80% barnaverndarmála koma upp á Suðvesturhorninu og hefur eftirspurn um meðferð í nærumhverfi aukist verulega síðustu ár.

Halldór segir að því sé mætt með meðferðarúrræði á Stuðlum og MST-meðferð sem fer fram á heimili barnsins. En að þörf fyrir meðferðarheimili á höfuðborgarsvæðinu sé sannarlega til staðar en nýtt heimili hefur verið í smíðum frá haustinu 2015.

„Við erum búin að gera alla heimavinnu sem að okkur snýr en þetta hefur verið fast annars staðar í kerfinu. Og nú er það þannig að við leitum að lóð og höfum leitað til sveitarfélaga eftir lóðum, fáum góðar undirtektir en því miður hefur ekkert gerst ennþá," segir Halldór.

Ítarlega var fjallað um málið í kvöldfréttum Stöðvar 2. Fréttina má sjá hér að neðan.