99 á land fyrsta daginn í Vatnamótunum

Það er greinilegt á þeim fréttum sem hafa verið að berast úr vatnasvæðunum fyrir austan að veiðitímabilið fer vel af stað.

Veiði hófst í Vatnamótunum 1. apríl og það er óhætt að segja að það hafi gengið vel en alls komu 99 sjóbirtingar á land samkvæmt fréttum frá vefnum Veiða.is en leyfi í Vatnamótin eru seld þar.  Veiðimenn fóru heldur seint út til veiða enda var kalt og ítrekað fraus í lykkjum.  Þeir sem opnuðu svæðið er sami eða svipaður hópur og hefur gert það undanfarin ár.  Vegna veðurs og skilyrða var aðeins veitt í rúmlega fjóra tíma en það skilaði engu að síður níutíu og níu sjóbirtingum á land.  Stærsti fiskurinn var 85 sm langur en töluvert var þó af fiski sem var 70-80 sm langur.  

Fiskur var víða á svæðinu en þar sem vatnið var mjög kalt voru tökurnar frekar grannar eins og veiðimenn þekkja við þau skilyrði.  Í fyrra veiddust um 1400 fiskar á svæðinu svo þessi frábæra byrjun vekur upp vonir að heildartalan á þessu tímabili gæti jafnvel farið fram úr því.