Belichick er besti þjálfari allra tíma en stundum er hann algjört fífl

Útherjinn Danny Amendola yfirgaf New England Patriots eftir síðustu leiktíð og er kominn í hlýjan faðm Miami Dolphins.

Amendola segir að tíminn hjá New England hafi verið eftirminnilegur og ekki síst út af þjálfaranum, Bill Belichick.

„Þetta var ekki alltaf auðvelt. Hann var stundum algjört fífl. Það var margt sem ég fílaði ekki við hann en ég veit að það sem fór í taugarnar á mér var hann að gera til þess að gera liðið betra,“ sagði Amendola.

„Hann er besti þjálfari allra tíma en hann er fyrsti maðurinn til þess að viðurkenna að það sé ekki auðvelt að spila undir hans stjórn. Hann lætur liðið hafa mikið fyrir hlutunum og ekki að ástæðulausu. Það skilar sér alltaf á endanum.“