Sindri handtekinn í Amsterdam

Sindri Þór Stefánsson var handtekinn í Amsterdam fyrr í dag. Þetta staðfestir talsmaður lögreglunnar í Amsterdam í samtali við Vísi. Talsmaðurinn heitir Rob van der Veen en hann segir Sindra Þór hafa verið handtekinn í miðborg Amsterdam.

Van der Veen segir Sindra Þór verða sendan til embættis héraðssaksóknara þar í borg á morgun og embættið muni setja sig í samband við yfirvöld á Íslandi vegna málsins. Gefin hafði verið út alþjóðleg handtökuskipun á hendur Sindra. Hann strauk frá fangelsinu að Sogni aðfaranótt síðastliðins þriðjudags.

Hann flaug sama morgun með flugi Icelandair frá Keflavíkurflugvelli til Arlanda-flugvallar í Stokkhólmi.

Ekkert hafði spurst til ferða Sindra fyrr en nú.

Ólafur Helgi Kjartansson, lögreglustjórinn á Suðurnesjum, segist í samtali við Vísi hafa fengið staðfest að Sindri Þór hafi verið handtekinn í Amsterdam fyrr í dag. 

Í haldi vegna Bitcoin-máls

Sindri hafði sætt gæsluvarðhaldi frá 2. febrúar vegna rannsóknar lögreglu á umfangsmiklum þjófnaði á tölvubúnaði. Fyrst var hann í gæsluvarðhaldi á grundvelli rannsóknarhagsmuna á Hólmsheiði. Hann hafði verið í varðhaldi á grundvelli almannahagsmuna að Sogni sem er opið fangelsi, þar sem föngum er treyst til þess að fara hvergi. Það komi niður á þeim bregðist þeir því trausti hefur komið fram í máli fangelsismálastjóra. Hann hafði verið tíu daga á Sogni þegar hann flúði.

Búnaðurinn er hluti af þýfinu í þremur innbrotum í gagnaver í Reykjanesbæ og í Borgarbyggð á sex vikna tímabili frá 5. desember til 16. janúar þar sem 600 tölvum að verðmæti rúmlega 200 milljónum króna var stolið. Grunur leikur á að málið gæti teygt anga sína til annarra landa.

Voru tölvurnar sérbúnar til að grafa eftir rafmyntinni Bitcoin.

Sagðist hafa verið frjáls ferða sinna

Sindri Þór sendi yfirlýsingu til Fréttablaðsins í síðustu viku þar sem hann sagðist hafa verið neyddur til að undirrita pappír sem stóð á að hann væri frjáls ferða sinna. Um leið hafi honum verið gert ljóst að ef hann færi mynda hann gista fangaklefa þangað til framlenging á gæsluvarðhaldi yrði samþykkt. 

Var Sindri þar að vísa til þess að gæsluvarðhaldsúrskurður yfir honum hefði ekki verið í gildi þegar hann lagði á flótta frá Sogni. Sindri var leiddur fyrir dómara síðastliðinn mánudag, daginn sem úrskurðurinn féll úr gildi, en dómari tók sér frest til að ákveða sig. 

Ætlaði að koma aftur til Íslands

Sindri sagðist hafa verið upplýstur um að hann væri í raun frjáls ferða sinna meðan dómarinn tók sér frest en hann yrði handtekinn ef hann yfirgæfi fangelsið. Álitaefni er hvort lögregla hafi mátt halda Sindra án þess að handtaka hann en fordæmi eru fyrir því að slík aðgerð lögreglu sé átalin.

Sindri sagðist hafa verið í gæsluvarðhaldi í tvo og hálfan mánuð að ósekju og án sönnunargagna en viðurkenndi að það hefði verið röng ákvörðun af honum að flýja. Hann var 

Sagðist hann ætla að koma fljótlega aftur heim til Íslands og verið væri að ræða við lögregluna á Íslandi um það. Ólafur Helgi Kjartansson, lögreglustjóri á Suðurnesjum, hafnaði því alfarið að samningaviðræður væru á milli lögreglunnar og Sindra. 

Athygli hefur vakið að lögreglustjórinn á Suðurnesjum óttaðist að Sindri myndi flýja land yrði hann í opnu gæsluvarðhaldi. Fangelsismálastjóri segist ekki hafa verið meðvitaður um þær áhyggjur lögreglustjórans.