Grænir reitir við BSÍ víki fyrir bráðabirgðabílastæðum spítalans

Landspítalinn hefur óskað eftir því við Reykjavíkurborg að fá tímabundin afnot af landi við Umferðarmiðstöðina, BSÍ, undir 237 bráðabirgðabílastæði vegna framkvæmda við spítalann. Afgreiðslu erindis þess efnis var frestað á fundi borgarráðs á fimmtudag.

Í beiðni Nýs Landspítala ohf. kemur fram að vegna fyrirhugaðra framkvæmda innan lóðar Landspítalans muni stór hluti núverandi bílastæða spítalans og Háskóla Íslands lenda innan framkvæmdasvæðisins. Áætlað er að framkvæmdir hefjist í næsta mánuði og standi yfir til ársloka 2021.

„Á framkvæmdatíma er nauðsynlegt að tryggja aðgengi að spítalanum fyrir sjúklinga, gesti spítalans og starfsfólk, því er þörf á bráðabirgðabílastæðum bæði innan og utan lóðar Landspítalans,“ segir orðrétt í umsókn spítalans.

Gert er ráð fyrir að malbikuðum bráðabirgðabílastæðum verði komið fyrir á grænum reitum norðan við BSÍ milli Vatnsmýrarvegar og Gömlu Hringbrautar. Áætlað er að 87 bílastæði verði á eystri grasreitnum en 150 á þeim vestari.

Gert er ráð fyrir því að bílastæðin verði gjaldskyld fyrir gesti spítalans en að starfsfólk og nemendur við Landspítalann muni hafa sérstök bílastæðakort. Nýr Landspítali mun lagfæra reitina á eigin kostnað að framkvæmdum loknum nema að um annað semjist.