Haraldur Franklín fyrstur karla á risamót

Haraldur Franklín Magnús, atvinnukylfingur, varð í dag fyrsti íslenski karlinn til þess að tryggja sér þáttöku á risamóti í golfi. Hann varð í öðru sæti á úrtökumóti fyrir Opna breska meistaramótið eftir frábæra spilamennsku.

Haraldur fór seinni hringinn af tveimur á tveimur höggum undir pari á Princes vellinum eftir að hafa farið fyrri hringinn á pari. Það dugði honum í annað sæti9 á mótinu en efstu þrír kylfingarnir fengu inngöngu á Opna breska.

Opna breska meistaramótið fer fram á Carnoustie vellinum um miðjan júli, dagana 19. - 22. júlí, og er eitt sögufrægasta mót heims.

Efstur á úrtökumótinu varð Englendingurinn Tom Lewis á fjórum höggum undir pari og í þriðja sæti varð Retief Goosen frá Suður-Afríku á höggi undir pari. Örfáir kylfingar eiga enn eftir að ljúka leik en þeir eiga allir litla sem enga möguleika á því að ná í efstu þrjú sætin.

Ólafía Þórunn Kristinsdóttir og Valdís Þóra Jónsdóttir eru einu íslensku kylfingarnir sem hafa spilað á risamóti og bætist Haraldur Franklín í þeirra hóp um miðjan mánuðinn. Hann verður einnig annar íslenski karlinn í sögunni til þess að spila á móti sem er hluti af PGA mótaröðinni en Ólafur Björn Loftsson tók þátt í Whyndham-mótinu árið 2011.