Valdís Þóra úr leik á Opna skoska

Valdís Þóra Jónsdóttir er að öllum líkindum úr leik á Opna skoska meistaramótinu í golfi sem fer fram í Aberdeen. Hún kláraði annan hringinn í dag á pari vallarins og var samtals á þremur höggum yfir pari.

Valdís átti ekki nógu góðan dag í gær og kláraði fyrsta hringinn á þremur höggum yfir pari. Niðurskurðarlínan hefur haldist við eitt högg yfir par í dag og því erfitt, en alls ekki ómögulegt, verkefni fyrir höndum hjá Valdísi að komast í gegnum niðurskurðinn.

Hún byrjaði daginn mjög vel og fékk fugl á annari holu. Hún fékk svo skolla á 6. holu en kláraði fyrri níu með því að bæta við öðrum fugli og var því einu höggi undir pari, samtals á tveimur yfir í mótinu, eftir fyrri níu holurnar.

Seinni níu holurnar voru mjög skrautlegar hjá Skagakonunni. Hún fékk fugl á 11. holu og var komin undir niðurskurðarlínuna. Svo komu hins vegar tveir skollar og einn fugl á næstu þremur holum og Íslandsmeistarinn 2017 aftur dottin úr leik.

Eftir par á 15. - 17. holu fékk Valdís svo skolla á 18. og var þar með nokkuð ljóst að hún sé úr leik. Eins og staðan var í mótinu þegar Valdís lauk leik lenti hún jöfn í 96. sæti.

Ólafía Þórunn Kristinsdóttir er einnig á meðal keppenda í mótinu. Hún átti enn erfiðara verkefni fyrir höndum því hún lék fyrsta hringinn á sex höggum yfir pari. Hún er tiltölulega nýfarin af stað á öðrum hring og er búin að fá tvo fugla á fyrstu fimm holunum.