Fjórtán særðir í hnífaárás í Þýskalandi

Fjórtán særðust, og þar af tveir alvarlega, þegar maður veittist með eggvopni að farþegum um borð í strætisvagni í þýsku borginni Luebeck. Árásin átti sér stað laust fyrir klukkan tvö í dag.

Þýska lögreglan er með mikinn viðbúnað vegna málsins og óstaðfestar heimildir fréttastofu BBC herma að árásarmaðurinn sé nú í haldi lögreglu.

Stór hluti lögregluliðs borgarinnar hefur verið kallaður út vegna árásarinnar að því er fram kemur í stöðuuppfærslu lögreglunnar á Twitter. 

Samkvæmt þýskum miðlum er árásarmaðurinn af írönsku bergi brotinn og notaði hann eldhúshníf til verknaðarins.

Ulla Hingst, þýskur saksóknari, segist ekki geta útilokað að um hryðjuverk sé að ræða.