Mestu skógareldarnir í sögu Kaliforníu

Skógareldarnir í Kaliforníu eru nú opinberlega orðnir þeir stærstu í sögu ríkisins. Eldarnir eru sextán talsins og þekja nú svæði sem svipar til Los Angeles, um 115 þúsund hektara.

Alls hafa sjö látið lífið í eldunum svo vitað sé til, en eldarnir hafa haldið áfram að eflast vegna þurrkaveðurs og óhagstæðra vindátta.

Um 14 þúsund slökkviliðismenn og hundruðir á vegum hersins berjast nú við eldana en veðurstofan í Bandaríkjunum segir að staðan muni lítið skána í vikunni.

75 heimili hafa eyðilagst

Slökkviliði hefur einungis tekist að ná að stöðva framgang skógareldana á ákveðnum stöðum. Reiknað er með að hitastig komi til með að ná allt að 43 gráðum í norðurhluta ríkisins á næstu dögum sem mun gera slökkviliði erfitt fyrir.

Um 75 heimili hafa eyðilagst í eldunum og hafa þúsundir neyðst til að yfirgefa heimili sín vegna eldanna.

Mestu eldarnir í sögu ríkisins voru hinir svokölluðu Thomaseldar í lok 2017 þar sem 114 þúsund hektarar brunnu.