Kári ætlar 10 kílómetra á rétt undir 40 mínútum með soninn í kerru í Vestmannaeyjahlaupinu

„Þetta verður með afslappaðra móti í ár,“ segir Kári Steinn Karlsson, Íslandsmethafi í maraþoni, sem ætlar að hlaupa með eins árs gamlan son sinn í barnavagni í Vestmannaeyjahlaupinu á laugardag. Kári Steinn stefnir á að vera rétt undir 40 mínútum með tíu kílómetra í hlaupinu.

Vestamanneyjahlaupið hefur verið haldið árlega frá árinu 2011. Kári Steinn hefur tekið þátt í öll skiptin og þá alltaf í hálfmaraþoni.

„Maður hefur alltaf tekið þátt í þessu og hlaupið á fullu gasi með keppni í huga en ég er búinn að vera aðeins rólegri á æfingum í sumar. Þannig að það er fínt að hlaupa með guttann. Hann er orðinn mjög vanur því að sitja í kerru á hlaupum. Maður er búinn að venja hann vel við og honum finnst fátt skemmtilegra. Maður sleppur við barnapössun og þetta er líka ágætis afsökun þannig séð. Ég er ekki alveg upp á mitt besta því ég dró aðeins úr æfingum í sumar. Það er fínt líka að geta dregið aðeins úr væntingum og haft gaman,“ segir Kári.

Hann segir tímann fara að sjálfsögðu eftir veðri og vindum og tekur fram að Vestmannaeyjahlaupið sé svolítið brekkuhlaup. „Ég hugsa að ég muni hlaupa þetta rétt undir fjörutíu mínútum. Það væri fínt. Þá yrði engin ógurleg ferð á mér en samt færi ég þetta rösklega.“

Kári segist hafa kynnst þeim sem skipuleggja hlaupið og alveg fallið fyrir þessari keppni.

„Ég hef mætt á hverju ári síðan mér var boðið þarna í fyrsta skipti og finnst þetta ómissandi liður í sumrinu, að komast til Vestmannaeyja og

gera góða helgarferð úr þessu. Þetta er mjög skemmtileg hlaupaleið þó hún sé krefjandi og ekki til þess fallin að ná einhverjum hörku tímum. Það skiptir heldur ekki öllu máli heldur að njóta þess að hlaupa í fallegu umhverfi.“

Hann segir hækkunina í hlaupinu vera þokkalega miðað við götuhlaup en ekkert í líkingu við þau fjallahlaup sem hann hefur tekið þátt í. Til viðmiðunar segir Kári að þeir sem hafa náð að hlaupa tíu kílómetra í Reykjavíkurmaraþoninu á klukkutíma geti hæglega búist við því að vera tveimur til þremur mínútum lengur með tíu kílómetra í Vestmannaeyjahlaupinu.