Utanríkisráðherra Ástralíu segir af sér

Julie Bishop, utanríkisráðherra Ástralíu, hefur sagt af sér sem utanríkisráðherra landsins. Afsögnin kemur í skugga innanflokksátaka. Bishop hefur gegnt embætti utanríkisráðherra landsins frá árinu 2013.

Bishop hefur ekki gert upp hug sinn hvort hún hyggist starfa áfram á þinginu fram að næstu kosningum en þær verða haldnar, að öllum líkindum, snemma á næsta ári. 

„Ég sagði forsætisráðherranum það í dag að ég hygðist láta af störfum sem utanríkisráðherra,“ segir Bishop í yfirlýsingu.

Bishop bauð sig fram gegn Scott Morrison og Peter Dutton í leiðtogakjöri Frálslynda flokksins sem fór fram á föstudag en hún laut í lægra haldi fyrir hinum nýskipaða forsætisráðherra landsins, Scott Morrison.

Utanríkisráðherrann hlaut einungis 11 atkvæði af 85 og er sögð afar vonsvikin yfir niðurstöðunum. Guardian greinir frá þessu. 

Yfirlýsing Bishops kemur í skugga mikilla innanflokksátaka. Áhyggjur flokksmanna af slæmu gengi flokksins í skoðanakönnunum eru sagðar helsta ástæðan fyrir átökunum innan flokksins.