Ólafía Þórunn með flottan hring í Frakklandi

Ólafía Þórunn Kristinsdóttir er örugg í gegnum niðurskurðinn á Lacoste Ladies Open de France mótinu en það er hluti af LET Evrópumótaröðinni. Bestu íslensku kvenkylfingarnir eru báðar með á mótinu.

Ólafía Þórunn lék annan hringinn á 68 höggum eða þremur höggum undir pari. Hún fór fyrsta hringinn á pari í gær og er nú í 16. sæti á þremur höggum undir pari.

Mótið fer fram á Golf du Medoc – Chateaux vellinum  í suðvestur Frakklandi.

Niðurskurðarlínan er núna við +1 og Ólafía Þórunn getur því farið að undirbúa sig fyrir þriðja hringinn á morgun.

Ólafía Þórunn fékk fimm fugla og tvo skolla á hringnum í dag. Hún er búin að ná í fugl tvo daga í röð á bæði níundu og fjórtándu holunni en þær eru báðar par fimm holur.

Valdís Þóra Jónsdóttir er líka á mótinu og spilaði mun betur en í gær. Hún átti hins vegar litla möguleika að ná niðurskurðinum eftir slæman fyrsta dag.

Valdís Þóra lék fyrsta hringinn á 78 höggum eða sjö höggum yfir pari. Hún fékk sex fugla á hringnum í dag en það var ekki nóg. Það munaði samt litlu hjá Skagakonunni sem var ekki tilbúin að gefast upp. Hún lék á þremur höggum undir pari í dag og endaði því keppni fjórum höggum yfir pari.  Það skilar henni í 86. sætið eins og er.

Valdís Þóra var í 22. sæti á stigalista LET Evrópumótaraðarinnar fyrir mótið. Mótið í Frakklandi er ellefta mótið hjá Valdísi Þóru á þessu keppnistímabiliu á mótaröðinni. Besti árangur hennar er þriðja sæti.

Ólafía Þórunn er með keppnisrétt á LET Evrópumótaröðinni samhliða keppnisrétti hennar á LPGA mótaröðinni. Ólafía Þórunn er í 100. sæti á stigalista LET Evrópumótaraðarinnar. Mótið í Frakklandi er þriðja mótið á þessari leiktíð hjá Ólafíu á LET mótaröðinni.