Super Bowl-meistari gæti fengið 25 ára fangelsisdóm

Mychal Kendricks vann Super Bowl-leikinn með Philadelphia Eagles en hann mun ljúka árinu á því að fá þungan fangelsisdóm.

Kendricks hefur játað sekt sína en hann var sakaður um innherjasvik sem hann stóð í ásamt starfsmanni Goldman Sachs.

Kendricks hefur viðurkennt að hafa keypt innherjaupplýsingar með peningum, miðum á NFL-leiki og boðum í teiti. Hann er sagður hafa grætt að minnsta kosti 133 milljónir króna á þessum ólöglegu upplýsingum síðustu tvö árin.

Leikmaðurinn var kominn á samning hjá Cleveland Browns en Browns rifti samningi við hann í lok síðasta mánaðar er leikmaðurinn var ákærður.

Kendricks segist sjá eftir öllu saman og ætlar að greiða til baka allan gróðann sem hann fékk ólöglega. Dómur yfir honum verður ákveðinn í desember en hann gæti fengið allt að 25 ára fangelsisdóm fyrir brot sín.